ഭീകരാക്രമണ ഭീഷണി; ഹോട്ടലും റെയിൽവേ സ്റ്റേഷനും ലക്ഷ്യം, 300 പേരെ കൊല്ലുമെന്ന് ഇമെയിൽ
ഭീഷണി സന്ദേശത്തിന്റെ ഉറവിടം കണ്ടെത്തുന്നതിനും ഇമെയിൽ അയച്ച വ്യക്തികളെ തിരിച്ചറിയുന്നതിനുമായി സൈബർ ക്രൈം പൊലീസ് അന്വേഷണം ആരംഭിച്ചിട്ടുണ്ട്. സന്ദേശത്തിന്റെ ആധികാരികതയും ഭീഷണിക്ക് പിന്നിലുള്ളവരുടെ ലക്ഷ്യവും പരിശോധിച്ചുവരികയാണ്.
അതേസമയം, ഭീഷണിയെക്കുറിച്ച് സ്ഥിരീകരിക്കാത്ത വിവരങ്ങളോ കിംവദന്തികളോ പ്രചരിപ്പിക്കരുതെന്ന് ഹൈദരാബാദ് സിറ്റി പൊലീസ് പൊതുജനങ്ങളോട് അഭ്യർത്ഥിച്ചു. പരിഭ്രാന്തരാകാതെ ജാഗ്രത പാലിക്കണമെന്നും പോലീസ് നിർദേശിച്ചു.ഹൈദരാബാദ്: നഗരത്തിലെ പ്രമുഖ ഹോട്ടലിലും റെയിൽവേ സ്റ്റേഷനിലും ബോംബ് സ്ഫോടനം നടത്തുമെന്ന ഭീഷണിയുമായി ഇമെയിൽ സന്ദേശം ലഭിച്ചതിനെ തുടർന്ന് ഹൈദരാബാദിൽ അതീവ ജാഗ്രത പ്രഖ്യാപിച്ചു.
ലഷ്കർ-ഇ-തൊയ്ബയുമായി ബന്ധമുണ്ടെന്ന് അവകാശപ്പെടുന്ന വ്യക്തിയുടെ പേരിലാണ് ഭീഷണി സന്ദേശം ലഭിച്ചിരിക്കുന്നത്. ആക്രമണങ്ങളിൽ കുറഞ്ഞത് 300 പേർ കൊല്ലപ്പെടുമെന്നാണ് ഇമെയിലിലെ മുന്നറിയിപ്പ്.
കാച്ചിഗുഡയിലെ ഹോട്ടൽ ടൂറിസ്റ്റ് പ്ലാസയും കാച്ചിഗുഡ റെയിൽവേ സ്റ്റേഷനുമാണ് ആക്രമണത്തിന് ലക്ഷ്യമിടുന്നതായി ഇമെയിലിൽ പരാമർശിച്ചിരിക്കുന്നത്. 2008 നവംബർ 26-ന് മുംബൈയിൽ നടന്ന ഭീകരാക്രമണത്തിന് സമാനമായ ആക്രമണം അതേ തീയതിയിൽ ഹൈദരാബാദിലും ആവർത്തിക്കുമെന്നാണ് ഭീഷണി. നവംബർ 21ന് ഹൈദരാബാദ് പോലീസ് സ്പെഷ്യൽ ബ്രാഞ്ച് ഇതുസംബന്ധിച്ച് സുരക്ഷാ മുന്നറിയിപ്പ് പുറപ്പെടുവിച്ചതായാണ് റിപ്പോർട്ടുകൾ.
ലഷ്കർ-ഇ-തൊയ്ബ നേതാവ് ലത്തീഫ് ഭട്ടിനെയും മറ്റ് കൂട്ടാളികളെയും വധിച്ചതിന് പ്രതികാരമായാണ് ആക്രമണം നടത്തുന്നതെന്നാണ് ഇമെയിൽ അയച്ചയാൾ അവകാശപ്പെട്ടിരിക്കുന്നത്. എന്നാൽ ഭീഷണിയുടെ വിശ്വാസ്യതയും ഇതിന് പിന്നിലുള്ളവരുടെ വ്യക്തിത്വവും സംബന്ധിച്ച അന്വേഷണം തുടരുകയാണ്.
ഭീഷണി സന്ദേശത്തിന്റെ പശ്ചാത്തലത്തിൽ ഹൈദരാബാദ് സിറ്റി പൊലീസ് വിവിധ സുരക്ഷാ നടപടികൾ ആരംഭിച്ചു. ഭീഷണിയിൽ പരാമർശിച്ച സ്ഥലങ്ങളിൽ പ്രത്യേക നിരീക്ഷണവും അട്ടിമറി വിരുദ്ധ പരിശോധനകളും നടത്തിവരികയാണ്.നഗരത്തിലെ പ്രധാന കേന്ദ്രങ്ങളിലും പൊതുസ്ഥലങ്ങളിലും പൊലീസ് സുരക്ഷ വർധിപ്പിച്ചിട്ടുണ്ട്.
ഹോട്ടൽ ടൂറിസ്റ്റ് പ്ലാസ, കാച്ചിഗുഡ റെയിൽവേ സ്റ്റേഷൻ എന്നിവയ്ക്ക് പുറമെ നഗരത്തിലെ മറ്റ് പ്രധാനപ്പെട്ടതും സുരക്ഷാപരമായി നിർണായകവുമായ കേന്ദ്രങ്ങളിലും നിരീക്ഷണം ശക്തമാക്കാൻ നിർദേശിച്ചിട്ടുണ്ട്. ട്രാഫിക് പൊലീസിനും ടാസ്ക് ഫോഴ്സ് വിഭാഗത്തിനും ഇതുസംബന്ധിച്ച പ്രത്യേക നിർദേശങ്ങൾ നൽകിയിട്ടുണ്ട്.സംശയാസ്പദമായ വ്യക്തികൾ, ഉപേക്ഷിക്കപ്പെട്ട നിലയിൽ കാണപ്പെടുന്ന വസ്തുക്കൾ, സംശയകരമായ വാഹനങ്ങൾ, അസാധാരണമായ നീക്കങ്ങൾ എന്നിവ പ്രത്യേകം നിരീക്ഷിക്കാനും നിർദേശമുണ്ട്.മതിയായ പട്രോളിംഗ് ഉറപ്പാക്കുന്നതിനൊപ്പം അട്ടിമറി വിരുദ്ധ പരിശോധനകളും നടത്താനും മറ്റ് സുരക്ഷാ ഏജൻസികളുമായി ഏകോപനം ശക്തമാക്കാനും നിർദേശമുണ്ട്.
ഭീഷണി സന്ദേശത്തിന്റെ ഉറവിടം കണ്ടെത്തുന്നതിനും ഇമെയിൽ അയച്ച വ്യക്തികളെ തിരിച്ചറിയുന്നതിനുമായി സൈബർ ക്രൈം പൊലീസ് അന്വേഷണം ആരംഭിച്ചിട്ടുണ്ട്. സന്ദേശത്തിന്റെ ആധികാരികതയും ഭീഷണിക്ക് പിന്നിലുള്ളവരുടെ ലക്ഷ്യവും പരിശോധിച്ചുവരികയാണ്. അതേസമയം, ഭീഷണിയെക്കുറിച്ച് സ്ഥിരീകരിക്കാത്ത വിവരങ്ങളോ കിംവദന്തികളോ പ്രചരിപ്പിക്കരുതെന്ന് ഹൈദരാബാദ് സിറ്റി പൊലീസ് പൊതുജനങ്ങളോട് അഭ്യർത്ഥിച്ചു. പരിഭ്രാന്തരാകാതെ ജാഗ്രത പാലിക്കണമെന്നും പോലീസ് നിർദേശിച്ചു.


