സൗദിയിലേക്ക് അഞ്ചാം ദിവസവും ആക്രമണം തുടർന്ന് ഹൂതികൾ; റിയാദിൽ മിസൈൽ അവശിഷ്ടങ്ങൾ വീണ് നാല് പേർക്ക് പരിക്ക്
റിയാദ്: സൗദി അറേബ്യയിലെ സിവിലിയൻ, ഊർജ കേന്ദ്രങ്ങളും വിമാനത്താവളങ്ങളും ലക്ഷ്യമിട്ട് അഞ്ചാം ദിവസവും ആക്രമണം തുടർന്ന് യമനിലെ ഹൂതി വിമതർ. ചൊവ്വാഴ്ച രാത്രി വൈകി നടത്തിയ ആക്രമണങ്ങളിൽ മിസൈൽ അവശിഷ്ടങ്ങൾ പതിച്ച് നാല് പേർക്ക് പരിക്കേറ്റു.
രണ്ട് സ്ത്രീകൾക്കും കുട്ടിക്കും പുരുഷനുമാണ് പരിക്ക്. 15 വീടുകൾക്കും കേടുപാട് സംഭവിച്ചു. ദഹ്റാനിലെ അരാംകോ ആസ്ഥാനത്തിന് നേരെയും ആക്രമണമുണ്ടായി. കെട്ടിടത്തിന് ചെറിയ തോതിൽ തീപിടിച്ചിട്ടുണ്ട്. റിയാദിനൊപ്പം ഖമീസ് മുശൈത്തിലേക്കും ദമ്മാമിലേക്കും ഹൂതികൾ ആക്രമണം നടത്തിയിരുന്നു. ഡ്രോണും ക്രൂയിസ് മിസൈലും ബാലിസ്റ്റിക് മിസൈലുകളും അടക്കം ഉപയോഗിച്ച് നടന്ന ആക്രമണങ്ങൾ സൗദി സഖ്യസേന പ്രതിരോധിച്ചു. റിയാദിൽ അടക്കം സൗദി സിവിൽ ഡിഫൻസ് മുന്നറിയിപ്പും നൽകിയിരുന്നു.
സൗദിയിലെ ദഹ്റാനിലും അൽഅഹ്സയിലും ബാലിസ്റ്റിക് മിസൈൽ ആക്രമണം നടത്തിയിരുന്നു. ഈ മിസൈലുകൾ തകർത്തപ്പോൾ അവശിഷ്ടങ്ങൾ താമസ സ്ഥലത്ത് പതിച്ചിരുന്നു. ദമ്മാമിനെ ലക്ഷ്യംവെച്ചും ഹൂതികളുടെ ആക്രമണ ശ്രമമുണ്ടായിട്ടുണ്ട്. ദമ്മാം എയർപോർട്ടിൽ സർവീസ് നിയന്ത്രണവും ഏർപ്പെടുത്തിയിരുന്നു. സൗദിയിലേക്ക് നടത്തിയ ആക്രമണ ശ്രമങ്ങൾ പ്രതിരോധിച്ചതായി സൗദി സഖ്യസേനാ വക്താവ് കേണൽ തുർക്കി അൽ മാലികി വ്യക്തമാക്കിയിട്ടുണ്ട്.
യമനിൽ ഹൂതികളും സർക്കാർ സേനയും തമ്മിൽ ഏറ്റുമുട്ടൽ ശക്തമായി തുടരുകയാണ്. ഹൂതി കേന്ദ്രങ്ങളിൽ സഖ്യ സേന നേതൃത്വത്തിൽ വ്യോമാക്രമണവും നടത്തിയിരുന്നു. ഹൂതികേന്ദ്രങ്ങളോട് ചേർന്ന് താമസിക്കുന്ന ജനങ്ങൾ ഒഴിഞ്ഞു പോകണമെന്നും വരും മണിക്കൂറുകളിൽ ഏറ്റുമുട്ടൽ കനക്കുമെന്നും പിഎൽസി ചെയർമാൻ റഷാദ് ആലമി ആവശ്യപ്പെട്ടടിട്ടുണ്ട്.
