മകളുടെ വിവാഹത്തിനു നാട്ടിൽ പോകാനിരിക്കെ മലയാളിക്ക് ആകസ്മിക മരണം

കണ്ണൂർ സ്വദേശിയായ റസ്റ്ററന്റ് ഷെഫിന് ആകസ്മിക മരണം. ബ്രിട്ടനിലെ വോക്കിങ്ങിലാണ് സംഭവം.  കണ്ണൂർ ജില്ലയിലെ പയ്യന്നൂർ കുഞ്ഞിമംഗലം കണിയാൽ വീട്ടിൽ കെ. വിജയൻ(63) ആണ് അന്തരിച്ചത്. വോക്കിങ്ങിലെ ഗിൽഡ്ഫോർഡ് റോഡിലുള്ള ചെന്നൈ ദോശ റസ്റ്ററന്റിൽ ഷെഫായി ജോലി ചെയ്തു വരികയായിരുന്നു വർഷങ്ങൾക്ക് മുൻപ് യുകെയിൽ എത്തിയ വിജയൻ.

മൂന്നു ദിവസം മുൻപ് ജോലി ചെയ്തുകൊണ്ടിരിക്കെ അനുഭവപ്പെട്ട നെഞ്ചുവേദനയെത്തുടർന്ന് ആശുപത്രിയിൽ പരിശോധനക്കായി പോയതായിരുന്നു ഇദ്ദേഹം. ആശുപത്രിയിൽ വച്ച് സ്ട്രോക്ക് ഉണ്ടായതിനെ തുടർന്ന് ആരോഗ്യ നില ഗുരുതരമായി. തുടർന്ന് എയർ ആംബുലൻസിൽ ലണ്ടൻ കിങ്‌സ് ആശുപത്രിയിൽ എത്തിച്ച് വെന്റിലേറ്റർ സൗകര്യം നൽകിയെങ്കിലും ജീവൻ രക്ഷിക്കാനായില്ല.

ജനുവരി 7നു നാട്ടിൽ പോകാനിരിക്കെയാണ് വിജയന് ആകസ്മിക മരണം സംഭവിച്ചത്. ഫെബ്രുവരി 15 ന് തളിപ്പറമ്പ് കൂവേരി സ്വദേശിയുമായി ഇളയ മകളുടെ വിവാഹത്തിനായുള്ള ഒരുക്കങ്ങൾ നാട്ടിൽ നടക്കുകയായിരുന്നു. കുടുംബാംഗങ്ങൾ നാട്ടിൽ ആയതിനാൽ സംസ്ക്കാരം പിന്നീട് നാട്ടിൽ നടക്കും. ഭാര്യ: ലളിത. മക്കൾ: കവിത, വിജിത. മരുമകൻ: രമിത്.

കൂടുതൽ വാർത്തകൾക്ക് വാട്സ് ആപ്പ് ഗ്രൂപ്പിൽ അംഗമാകാൻ ഇവിടെ ക്ലിക്ക് ചെയ്യുക