സഞ്ജു തിരിച്ചെത്തുന്നു; അഫ്ഗാനെതിരായ ട്വന്റി 20 ടീമിൽ ശക്തമായ താരനിര
ന്യൂഡൽഹി: അഫ്ഗാനിസ്ഥാനെതിരായ വരാനിരിക്കുന്ന ട്വന്റി20 പരമ്പരയ്ക്കുള്ള ഇന്ത്യൻ ടീമിനെ ബിസിസിഐ പ്രഖ്യാപിച്ചു. മലയാളി താരം സഞ്ജു സാംസൺ ടീമിലേക്ക് തിരിച്ചെത്തിയത് ആരാധകർക്ക് വലിയ സന്തോഷമാണ് നൽകിയിരിക്കുന്നത്. പരിക്കിനെത്തുടർന്ന് വിശ്രമത്തിലായിരുന്ന സ്റ്റാർ പേസർ ജസ്പ്രീത് ബുംറയും ടീമിൽ തിരിച്ചെത്തിയിട്ടുണ്ട്. എന്നാൽ അന്തിമ ഇലവനിലേക്ക് സ്ഥാനം പിടിക്കാൻ ബുംറയ്ക്ക് ഫിറ്റ്നസ് തെളിയിക്കേണ്ടി വരും.
ശ്രേയസ് അയ്യരാണ് ടീമിന്റെ നായകൻ. തിലക് വർമ്മ വൈസ് ക്യാപ്റ്റനാകും. യുവതാരം വൈഭവ് സൂര്യവംശിയെയും ട്വന്റി20 ടീമിൽ ഉൾപ്പെടുത്തിയിട്ടുണ്ട്. ബുംറയ്ക്ക് പുറമെ നിതീഷ് കുമാർ റെഡ്ഡി, വാഷിംഗ്ടൺ സുന്ദർ, ഹർഷിത് റാണ എന്നിവരുടെ ടീമിലെ പങ്കാളിത്തവും ഫിറ്റ്നസ് പരിശോധനയ്ക്ക് വിധേയമായിരിക്കും. പരിക്കിൽ നിന്ന് പൂർണമായി മുക്തനാകാത്തതിനാൽ ഓൾറൗണ്ടർ ഹാർദിക് പാണ്ഡ്യയ്ക്ക് ടീമിൽ ഇടം ലഭിച്ചില്ല. ഈ വർഷത്തെ ട്വന്റി20 ലോകകപ്പ് ഫൈനലിലാണ് ഹാർദിക് അവസാനമായി ഇന്ത്യക്കായി കളിച്ചത്.
ഹാർദിക് പുറത്തായപ്പോൾ സഞ്ജു സാംസണിന്റെയും ജസ്പ്രീത് ബുംറയുടെയും തിരിച്ചുവരവാണ് ടീമിലെ പ്രധാന മാറ്റം. വിക്കറ്റ് കീപ്പർ ബാറ്ററായ സഞ്ജുവിന് ടീമിൽ വീണ്ടും അവസരം ലഭിച്ചതോടെ ഇന്ത്യൻ ടീം കൂടുതൽ ശക്തമാകും.ഇന്ത്യൻ ടീംശ്രേയസ് അയ്യർ (ക്യാപ്റ്റൻ), അഭിഷേക് ശർമ, വൈഭവ് സൂര്യവംശി, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), തിലക് വർമ്മ (വൈസ് ക്യാപ്റ്റൻ), ശിവം ദുബെ, നിതീഷ് കുമാർ റെഡ്ഡി*, അക്സർ പട്ടേൽ, വാഷിങ്ടൺ സുന്ദർ*, വരുൺ ചക്രവർത്തി, രവി ബിഷ്ണോയ്, ജസ്പ്രീത് ബുംറ*, അർഷ്ദീപ് സിംഗ്, ഹർഷിത് റാണ*. (* ഫിറ്റ്നസിന് വിധേയം)
