പൈലറ്റ് ബോധരഹിതനായി, വിമാനം 30,000 അടി ഉയരത്തിൽ; ബഹളം വെച്ച് യാത്രക്കാർ, ഒടുവിൽ അടിയന്തര ലാൻഡിങ്
ഏഥൻസ്: 30,000 അടി ഉയരത്തിൽ പറക്കുന്നതിനിടെ പൈലറ്റ് ബോധരഹിതനായതിനെ തുടർന്ന് വിമാനം അടിയന്തരമായി ലാൻഡ് ചെയ്തു. യുകെയിലെ ബർമിംഗ്ഹാമിൽ നിന്നും തുർക്കിയിലെ അൻ്റാലിയയിലേക്ക് സഞ്ചരിച്ച ജെറ്റ് 2 വിമാനമാണ് സഹപൈലറ്റ് ലാൻഡ് ചെയ്തത്.
ഓഗസ്റ്റ് 23നാണ് വിമാനം അടിയന്തരമായി ലാൻഡ് ചെയ്തത്. ആശങ്കയുണ്ടാക്കുന്ന സാഹചര്യം വിമാനത്തിൽ സംഭവിച്ചതായി മനസിലാക്കിയതോടെ യാത്രക്കാർ വിവരം തിരക്കി. എന്താണ് ഉണ്ടായതെന്ന് പറയാൻ മടിച്ചെങ്കിലും ആളുകൾ ബഹളം വെച്ചതോടെ
പൈലറ്റിന് ബോധം നഷ്ടമായതായി ക്രൂ അംഗങ്ങൾ യാത്രക്കാരെ അറിയിച്ചു.
പരിഭ്രാന്തരായ യാത്രക്കാർ അടിയന്തര ലാൻഡിങ് ആവശ്യപ്പെട്ടതോടെ വിമാനത്തിൻ്റെ നിയന്ത്രണം സഹപൈലറ്റ് ഏറ്റെടുക്കുകയായിരുന്നു. എയര്‍ ട്രാഫിക് കണ്‍ട്രോള്‍ വിഭാഗവുമായി ബന്ധപ്പെട്ട ശേഷം ഗ്രീസിലെ തെസലോനിക്കി വിമാനത്താവളത്തിൽ വിമാനം സുരക്ഷിതമായി ലാൻഡ് ചെയ്യിക്കാൻ സഹ പൈലറ്റിന് സാധിച്ചെങ്കിലും ഒരു മണിക്കൂറോളം നേരം വിമാനം റണ്‍വേയില്‍ കിടന്നത് യാത്രക്കാരെ പ്രകോപിപ്പിച്ചു.
ലാൻഡ് ചെയ്ത വിമാനത്തിൽ നിന്നും ഒരു മണിക്കൂറിന് ശേഷമാണ് പൈലറ്റിനെ ആബുലൻസിൽ ആശുപത്രിയിലേക്ക് മാറ്റിയതെന്ന് വിദേശ മാധ്യമങ്ങൾ റിപ്പോർട്ട് ചെയ്തു. വിമാനം അടിന്തര ലാൻഡിങ് നടത്തിയ വിമാനത്തിൽ നിന്നും പുറത്തിറങ്ങാൻ അധികൃതർ അനുവദിച്ചില്ലെന്ന് യാത്രക്കാർ ആരോപിച്ചു.
മെഡിക്കൽ എമർജൻസി മൂലം വിമാനം ലാൻഡ് ചെയ്യേണ്ടി വന്നതിനാൽ യാത്രക്കാർക്ക് നഷ്ടപരിഹാരം നൽകാൻ കഴിയില്ലെന്ന് വിമാനക്കമ്പനി അറിയിച്ചു. യാത്രക്കാരെ മറ്റൊരു വിമാനത്തിൽ യഥാസ്ഥാനത്ത് എത്തിക്കുകയും ഭക്ഷണം അടങ്ങിയ 15 യൂറോയുടെ വൗച്ചർ നൽകിയെന്നും കമ്പനി വക്താവ് പറഞ്ഞു. യാത്രക്കാർക്ക് നേരിടേണ്ടി വന്ന കാലതാമസത്തിന് ക്ഷമാപണം നടത്തിയെങ്കിലും മെഡിക്കൽ എമർജൻസി കാരണം ഗ്രീസിൽ ഇറങ്ങുമെന്ന് യാത്രക്കാരെ അറിയിച്ചിരുന്നുവെന്ന വാദം വിമാന കമ്പനിയുടെ ഭാഗത്ത് നിന്നുമുണ്ടായി.
പൈലറ്റുമാർ ഉറങ്ങിപ്പോയതോടെ സുഡാനിലെ ഖാർതൂമിൽ നിന്ന് എത്യോപ്യയുടെ തലസ്ഥാനമായ അസിഡ് അബാബയിലേക്ക് പറന്ന വിമാനം ലാൻഡ് ചെയ്യാൻ വൈകിയത് വാർത്തകളിൽ നിറഞ്ഞിരുന്നു. എത്യോപ്യന്‍ എയര്‍ലൈന്‍സ് വിമാനത്തിലെ രണ്ട് പൈലറ്റുമാരാണ് ഉറങ്ങിപ്പോയത്. വിമാനം ലാൻഡ് ചെയ്യുന്നതിന് മിനിറ്റുകൾക്ക് മുൻപാണ് പൈലറ്റുമാറ്റുമാർ ഉറങ്ങിപ്പോയത്. 37,000 അടി ഉയരത്തിൽ വിമാനം സഞ്ചരിക്കുന്നതിനിടെയാണ് സംഭവം. ബോയിങ് 737-800 ഇ.ടി – 343യിലെ രണ്ട് പൈലറ്റുമാരാണ് വിമാനം ഓട്ടോ പൈലറ്റിലാക്കിയ ശേഷം ഉറങ്ങിയത്. ലാൻഡ് ചെയ്യേണ്ട വിമാനത്താവളം മറികടന്ന് വിമാനം സഞ്ചരിച്ചതോടെ അലാറം മുഴങ്ങിയതോടെയാണ് പൈലറ്റുമാർ ഉണർന്നത്.
