അവധി കഴിഞ്ഞെത്തിയ മലയാളി യുവാവ് സ്വിമ്മിങ് പൂളില്‍ മുങ്ങിമരിച്ചു
സ്വിമ്മിങ് പൂളില്‍ കുളിക്കുന്നതിനിടെ മലയാളി യുവാവ് മുങ്ങിമരിച്ചു. കോഴിക്കോട് പയ്യോളി മൂന്നുകുണ്ടന്‍ചാലില്‍ സജീവന്‍റെ മകന്‍ സിദ്ധാര്‍ഥ് (27) ആണ് മരിച്ചത്. ബഹ്റൈനിലെ സല്ലാഖിലെ സ്വമ്മിങ് പൂളില്‍ ചൊവ്വാഴ്ച പുലര്‍ച്ചെ മൂന്ന് മണിയോടെയാണ് സംഭവം.
ഡെലിവറിമാനായി ജോലി ചെയ്യുന്ന സിദ്ധാര്‍ഥ് അവധി കഴിഞ്ഞ് ഈ മാസം ഒന്നിനാണ് നാട്ടില്‍ നിന്ന് തിരിച്ചെത്തിയത്. സുഹൃത്തുക്കള്‍ക്കൊപ്പം സ്വമ്മിങ് പൂളില്‍ എത്തിയ സിദ്ധാര്‍ഥ് കുളിക്കുന്നതിനിടെ അപകടത്തില്‍പ്പെടുകയായിരുന്നു എന്നാണ് വിവരം.
ഉടന്‍തന്നെ സമീപത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.മൃതദേഹം സല്‍മാനിയ മെഡിക്കല്‍ കോംപ്ലക്സ് മോര്‍ച്ചറിയില്‍. ഷേര്‍ളിയാണ് മാതാവ്. ഭാര്യ: മമത. രണ്ട് വയസുള്ള മകനുണ്ട്.
കൂടുതൽ വാർത്തകൾക്ക് വാട്സ് ആപ്പ് ഗ്രൂപ്പിൽ അംഗമാകാൻ ഇവിടെ ക്ലിക്ക് ചെയ്യുക
