ചിട്ടയില്ലാത്ത ജീവിതവും ആഹാരക്രമവുമാണ് എന്നെ ആശുപത്രിയിലാക്കിയത് – അന്ന് സുബി പറഞ്ഞു – വീഡിയോ

സുബിയുടെ വാക്കുകള്‍
‘കുറച്ചു നാളായി വിഡിയോകളൊന്നും ഇടാത്തതിനു കാരണം എന്റെ ഭാഷയില്‍ പറഞ്ഞാല്‍ ഞാന്‍ ഒന്നു വര്‍ക്ഷോപ്പില്‍ കയറി. എന്റെ കൈയിലിരുപ്പ് കൂടി കുറച്ചു നന്നാകണമല്ലോ, വേറൊന്നുമല്ല സമയത്തിന് ആഹാരം കഴിക്കുക, മരുന്നുകള്‍ കൃത്യമായി കഴിക്കുക ഇങ്ങനെയുള്ള യാതൊരു നല്ല ശീലവും ഇല്ലാത്തതു കൊണ്ട് എല്ലാം കൂടി ഒരുമിച്ചു വന്നു. ഒരു ഷൂട്ടിനു പോകേണ്ടതിന്റെ തലേദിവസം മുതല്‍ ഒട്ടും വയ്യാതെയായി. ശരീരവേദന, നെഞ്ചുവേദന, ഗ്യാസ്ട്രിക് പ്രശ്‌നം, ഫുഡൊന്നും കഴിക്കാന്‍ പറ്റിയില്ല. വല്ലാത്ത ഛര്‍ദിയും ഉണ്ടായിരുന്നു. ഒരു കരിക്കിന്‍ വെള്ളം കുടിച്ചാല്‍ പോലും ഛര്‍ദിക്കുമായിരുന്നു.

രണ്ട് ദിവസം ആഹാരം കഴിക്കാതിരുന്നാല്‍ എന്റെ ശരീരം താങ്ങില്ലല്ലോ. അങ്ങനെ വല്ലാതെ തളര്‍ന്നു പോയി. ഗ്യാസ്ട്രിക് പ്ലോബ്ലം ഒക്കെ വന്നപ്പോള്‍ നെഞ്ചും പുറവുമൊക്കെ ഭയങ്കര വേദന. എനിക്ക് ടെന്‍ഷനായി. ഷോള്‍ഡറിന് വേദന വന്നപ്പോള്‍ തിരുവനന്തപുരത്തൂന്ന് ഇസിജി എടുത്തു നോക്കി. മനുഷ്യന്റെ കാര്യമല്ലേ? അതില്‍ കുഴപ്പമൊന്നും ഇല്ലായിരുന്നു. പക്ഷേ കുറച്ച് പൊട്ടാസ്യം കുറവുണ്ടായിരുന്നു. അത് നേരത്തെ എന്നെ ചികിത്സിച്ചിരുന്ന രാജഗിരിയിലെ ഡോക്ടറും പറഞ്ഞിരുന്നു. അതൊക്കെ കഴിഞ്ഞിട്ടും ഞാന്‍ മരുന്നൊന്നും കറക്ടായിട്ട് കഴിച്ചില്ല. ഷൂട്ടും യാത്രയുമൊക്കെയായി നടന്നു.

എല്ലാവരും വിചാരിക്കും കാശുണ്ടാക്കാനായി നടന്നു എന്ന്. എന്നാല്‍ അങ്ങനെയല്ല. കുറേ നാളായി പ്രോഗ്രാം ഒന്നുമില്ലാതിരുന്നിട്ട് ഒരു പ്രോഗ്രാം കിട്ടുമ്പോള്‍ വീട്ടിലിരിക്കാന്‍ ഇഷ്ടമില്ലാതെ പ്രോഗ്രോമിനായി പോകും. ഒരു പ്രോഗ്രാം ചെയ്യാനായി ആര്‍ത്തിയുള്ള ഒരാളാണ്. പൈസയോടല്ല, വര്‍ക്ക് ചെയ്യാനായി ക്രെയ്‌സ് ആണെനിക്ക്. കൂടെ കട്ടക്ക് നില്‍ക്കാനായി ഫാമിലിയുമുണ്ട്. യാത്ര ചെയ്യാന്‍ അനിയനുമുണ്ട്. അപ്പോള്‍ ജോളിയായിട്ട് അങ്ങു പോകാമല്ലോ എന്നു വിചാരിച്ച് ഒന്നും ശ്രദ്ധിക്കാതെ നടന്നു. സമയത്ത് ആഹാരം കഴിക്കാത്തതിന്റെ പേരില്‍ അനിയനും അമ്മയുമൊക്കെ വഴക്കു പറയും. ആഗ്രഹമുള്ള എന്തു സാധനം വേണമെങ്കിലും മേടിച്ചു തരാനായി അനിയനും അമ്മയുമൊക്കെ തയാറാണ്. പക്ഷേ എനിക്ക് കഴിക്കാനായുള്ള മൈന്‍ഡ് വരില്ല. വിശന്നാല്‍ കഴിക്കണം എന്നല്ല, കഴിക്കണമെന്ന് എനിക്ക് തോന്നണം. എന്നാലേ ആഹാരം കഴിക്കൂ. അതൊക്കെ എന്റെ ദുശീലമാണ് അതെല്ലാവരും മനസ്സിലാക്കണം.