അമൃതം പൊടിയിൽ മാരക വിഷം കണ്ടെത്തി. ഉൽപാദന യൂണിറ്റ് അടച്ചുപൂട്ടി

കൊച്ചി : അങ്കണവാടി വഴി വിതരണം ചെയ്ത അമൃതം പൊടിയിൽ മാരക വിഷം കണ്ടെത്തി. ഇതിനെ തുടർന്ന് അമൃതം പൊടി ഉൽപാദിപ്പിക്കുന്ന എടയ്ക്കാട്ടുവയലിലെ കുടുംബശ്രീ യൂണിറ്റ് തൽക്കാലത്തേക്ക് അടച്ചുപൂട്ടി. കൂടാതെ ഇവിടെ സൂക്ഷിച്ചിരുന്ന അമൃതം പൊടിയും ഇത് നിർമിക്കാനായി ശേഖരിച്ച് വെച്ച ധാന്യങ്ങളും സീൽ ചെയ്തു. ഇവയുടെ സാംപിൾ ഭക്ഷ്യസുരക്ഷാ വകുപ്പ് പരിശോധനയ്ക്കെടുത്തിട്ടുണ്ട്.

എടയ്ക്കാട്ടുവയലിലെ കേന്ദ്രത്തിൽ ഉത്‌പാദിപ്പിച്ച് വിതരണം ചെയ്ത 98 ബാച്ച് അമൃതം പൊടിയിലാണ് അഫ്ളോടോക്സിൻ ബി വൺ എന്ന വിഷവസ്തു കണ്ടെത്തിയത്. ഇതു സംബന്ധിച്ച് ഭക്ഷ്യസുരക്ഷാ വകുപ്പിന്റെ റിപ്പോർട്ട് ലഭിച്ചതോടെ വിതരണം ചെയ്ത അമൃതം പൊടി തിരിച്ചെടുക്കാനും ഐ.സി.ഡി.എസ്. അടിയന്തര നിർദേശം നൽകി. കുട്ടികൾക്ക് അങ്കണവാടി വഴി വിതരണം ചെയ്യുന്ന പോഷകാഹാരമാണ് അമൃതം പൊടി.