ഫ്ലാറ്റിന്‍റെ ചുമരിലോ ബാല്‍ക്കെണിയിലോ ഡിഷ് സ്ഥാപിച്ചാല്‍ സൌദിയില്‍ 500 റിയാല്‍ വരെ പിഴ. വികൃതമായ ചുമരെഴുത്തുകള്‍ക്കും പിഴ.
റിയാദ് – കെട്ടിട ലംഘനങ്ങളുടെ പുതിയ പട്ടിക പൊതുജനങ്ങളുടെ അഭിപ്രായങ്ങളും നിര്‍ദേശങ്ങളും സ്വരൂപിക്കുന്നതിനായി സൌദി മുനിസിപ്പൽ, ഗ്രാമീണ കാര്യ, ഭവന മന്ത്രാലയം (MOMRA) പ്രസിദ്ധീകരിച്ചു. വിവിധ ലംഘനങ്ങൾക്കുള്ള അഞ്ച് തലത്തിലുള്ള പിഴകൾ പട്ടികയിൽ ഉണ്ട്അ. SR20 മുതൽ SR6,000 വരെയാണ് ഈ നിയമപ്രകാരം പിഴ ഈടാക്കുക.
കരട് നിയമപ്രകാരം കെട്ടിടങ്ങളുടെയോ ബാൽക്കണിയുടെയോ വശങ്ങളിൽ സാറ്റലൈറ്റ് ഡിഷ് സ്ഥാപിച്ചാൽ കുറഞ്ഞത് 100 റിയാൽ പിഴയും പരമാവധി 500 റിയാൽ പിഴയും ചുമത്തും. ബാൽക്കണിയിൽ കെട്ടിടത്തിന്റെ ആകൃതിക്കും സ്വഭാവത്തിനും അനുയോജ്യമല്ലാത്ത ഹാംഗറുകളോ വസ്തുക്കളോ പ്രദർശിപ്പിച്ചാൽ 200 റിയാൽ മുതൽ 1000 റിയാൽ വരെ പിഴ ഈടാക്കും. ലംഘനങ്ങളുടെ പട്ടിക പ്രകാരം വാണിജ്യ കെട്ടിടങ്ങളുടെ ചുവരുകളിൽ ഏതെങ്കിലും വൃത്തികെട്ട ചുവരെഴുത്ത് ഉണ്ടായാലും അതേ പിഴ ചുമത്തും.
കെട്ടിടത്തിന് റൂഫ് ജാക്ക് ഇല്ലെങ്കിലും, കെട്ടിട ചട്ടങ്ങൾ ലംഘിക്കുന്ന ഉയരത്തില്‍ ജാക്ക് സ്ഥാപിച്ചാലും കുറഞ്ഞത് 100 റിയാലും പരമാവധി 500 റിയാലും പിഴ ചുമത്തും. വാണിജ്യ കെട്ടിടങ്ങളിൽ ജനവാതില്‍ തുറക്കുന്നതും ഡിസൈൻ ചട്ടങ്ങൾ ലംഘിക്കുന്നവർക്കും 200 റിയാൽ മുതൽ 1000 റിയാൽ വരെ പിഴ ചുമത്തും.
വാണിജ്യ കെട്ടിടങ്ങളുടെ മെസനൈൻ നിലയിലേക്ക് പ്രത്യേക ഗോവണി നിർമ്മിക്കുന്നതിൽ പരാജയപ്പെട്ടാല്‍ 1000 റിയാല്‍ മുതൽ 5000 റിയാൽ വരെയാണ് പിഴ. പാർക്കിംഗ്, പാസേജുകൾ എന്നിവയിൽ ഭിന്നശേഷിയുള്ളവരുടെ ആവശ്യകതകൾ ബില്‍ഡിംഗ് പെര്‍മിറ്റ് പ്രകാരം നടപ്പിലാക്കുന്നതിൽ പരാജയപ്പെട്ടാല്‍ 500 റിയാൽ മുതൽ 2500 റിയാൽ വരെ പിഴ ചുമത്തും.
ഭരണ ചട്ടങ്ങൾക്കും നിർദ്ദേശങ്ങൾക്കും അനുസൃതമായി കെട്ടിടത്തിൽ നിന്ന് പ്രധാന തെരുവിലേക്ക് നടപ്പാതകൾ നിർമ്മിച്ചില്ലെങ്കിൽ, ഏറ്റവും കുറഞ്ഞ പിഴ 20 റിയാലും പരമാവധി 100 റിയാലും പട്ടികയിൽ ഉൾപ്പെടുത്തിയിട്ടുണ്ട്.
വാണിജ്യ കെട്ടിടങ്ങളുടെ മേൽക്കൂരയുടെ ഭിത്തികളിൽ ഇരുമ്പ് തൂണുകളോ ഇരുമ്പ് ഷിൻകോ സ്‌ക്രീനുകളോ സ്ഥാപിക്കുന്നതുമായി ബന്ധപ്പെട്ട നിയമലംഘനങ്ങൾക്ക് കുറഞ്ഞത് 1200 റിയാൽ പിഴയും പരമാവധി 6000 റിയാൽ പിഴയും ചുമത്തും. കെട്ടിടങ്ങളുടെ മുൻഭാഗങ്ങളിലെ വിള്ളലുകൾ അല്ലെങ്കിൽ കേടുപാടുകൾ അല്ലെങ്കിൽ മുൻഭാഗങ്ങളിലെ ലോഹ വസ്തുക്കളിൽ ദൃശ്യമായ തുരുമ്പ് എന്നിവയ്ക്കുള്ള പിഴയുടെ മൂല്യം SR100 നും 500 SR നും ഇടയിലാണ്.
വാണിജ്യ കെട്ടിടത്തിന്റെ മുൻവശത്ത് ദൃശ്യമാകുന്ന ഇലക്ട്രിക്കൽ-സാനിറ്ററി-മെക്കാനിക്കൽ എക്സ്റ്റൻഷൻ പ്രവൃത്തികളുമായി ബന്ധപ്പെട്ട ലംഘനങ്ങൾക്ക് 200 റിയാൽ മുതൽ 1,000 റിയാൽ വരെയാണ് പിഴ. റോഡിന് അഭിമുഖമായുള്ള വാണിജ്യ കെട്ടിടത്തിന്റെ മുൻഭാഗങ്ങളിലെ എയർ കണ്ടീഷനിംഗ് യൂണിറ്റുകളുമായി ബന്ധപ്പെട്ട ലംഘനങ്ങൾക്കു SR50 മുതൽ SR250 വരെ പിഴ ചുമത്തും.
പൊതുജനാഭിപ്രായം കൂടി പരിഗണിച്ച് ഈ നിയമം നടപ്പിലാക്കുമെന്നാണ് സൂചന.
