ഫാ. തിയോഡേഷ്യസിൻ്റെ മാപ്പ് അംഗീകരിക്കില്ല, ആരുടെയും സര്‍ട്ടിഫിക്കറ്റ് വേണ്ട- മന്ത്രി അബ്ദുറഹ്‌മാന്‍
കലാപത്തിനും ചേരിതിരിവിനും ശ്രമിച്ചു; ഫാദര്‍ തിയോഡേഷ്യസിനെതിരായ FIR-ല്‍ ഗുരുതര പരാമര്‍ശങ്ങള്‍
വിഴിഞ്ഞം തുറമുഖ വിരുദ്ധ സമരസമിതി കണ്‍വീനര്‍ ഫാദര്‍ തിയോഡേഷ്യസ് ഡിക്രൂസിന്റെ മാപ്പ് അംഗീകരിക്കില്ലെന്ന് ഫിഷറീസ് മന്ത്രി വി. അബ്ദുറഹ്‌മാന്‍. തിരുവനന്തപുരത്ത് മാധ്യമങ്ങളോടു പ്രതികരിക്കുകയായിരുന്നു അദ്ദേഹം. വികസനത്തിന് തടസ്സം നില്‍ക്കാന്‍ പാടില്ലെന്നാണ് താന്‍ പറഞ്ഞതെന്നും മന്ത്രി കൂട്ടിച്ചേര്‍ത്തു.
ഫാദര്‍ തിയോഡേഷ്യസ് ഡിക്രൂസ് മന്ത്രി അബ്ദുറഹ്‌മാനെതിരേ നടത്തിയ പരാമര്‍ശം വലിയ വിമര്‍ശനത്തിന് വഴിവെച്ചിരുന്നു. തുടര്‍ന്ന്, സംഭവിച്ചത് നാക്കുപിഴയാണെന്നും ഖേദം പ്രകടിപ്പിക്കുന്നെന്നും ഫാദര്‍ തിയോഡേഷ്യസ് പറഞ്ഞിരുന്നു.
അതേ സമയം ഫിഷറീസ് മന്ത്രി വി. അബ്ദുറഹ്‌മാനെതിരായ വിവാദപരാമര്‍ശ കേസില്‍ ഫാദര്‍ തിയോഡേഷ്യസ് ഡിക്രൂസിനെതിരേ എഫ്.ഐ.ആറില്‍ ഗുരുതര പരാമര്‍ശങ്ങളാണ് ഉൾപ്പെടുത്തിയിട്ടുള്ളത്. മുസ്‌ലിം- ക്രിസ്ത്യന്‍ വിഭാഗങ്ങള്‍ക്കിടയില്‍ ധ്രുവീകരണത്തിനും കലാപത്തിനും ചേരിതിരിവിനും ശ്രമിച്ചെന്നാണ്‌ എഫ്.ഐ.ആറിലുള്ളത്‌. ബുധനാഴ്ച രജിസ്റ്റര്‍ ചെയ്ത കേസിലാണ് ഗുരുതര പരാമര്‍ശങ്ങളുള്ളത്.
