ഹൃദയാഘാതത്തെ തുടർന്ന് മലയാളി ഒമാനിലെ ജയിലിൽ മരിച്ചു; മരണവിവരം പുറത്തറിയുന്നത് ജയിലിൽ നിന്ന് പരിചയപ്പെട്ടയാൾ പുറത്തിറങ്ങിയപ്പോൾ
മസ്കറ്റ്: ഹൃദയാഘാതത്തെ തുടർന്ന് മലപ്പുറം സ്വദേശി ഒമാനിലെ ജയിലിൽ മരിച്ചു. തേഞ്ഞിപ്പലം പുത്തൂർ പള്ളിക്കലിലെ പണിക്കാറത്ത് മേലെ വീട്ടിൽ അഹമ്മദ് കുട്ടിയുടെ മകൻ അബ്ദുൽ റസാഖാണ് (50) മരിച്ചത്. ഒമാനിലെ സമാഇലിൽ ജയിലിൽ നാല് ദിവസങ്ങൾക്ക് മുമ്പ് മരിച്ചെന്നാണ് ബന്ധുക്കൾക്ക് ലഭിച്ച വിവരം.
അബ്ദുൽ റസാഖിനെ ജയിലിൽനിന്ന് പരിചയപ്പെട്ട കണ്ണൂർ തളിപ്പറമ്പ് സ്വദേശിയാണ് പുറത്തിറങ്ങിയ ശേഷം മരണവിവരം കെ.എം.സി.സിയെ ധരിപ്പിക്കുന്നത്. പിന്നീട് കെ.എം.സി.സി നാട്ടിലുള്ള ബന്ധുക്കളെ അറിയിക്കുകയായിരുന്നു.
സാമ്പത്തിക ഇടപാടുമായി ബന്ധപ്പെട്ട് നാല് മാസങ്ങൾക്ക് മുമ്പാണ് അബ്ദുൽ റസാഖ് ജയിലിലാകുന്നത്. കോവിഡ് കാലത്തെ റൂം വാടകയും മറ്റും അടക്കം വലിയ സാമ്പത്തിക ബാധ്യത ഇദ്ദേഹത്തിനുണ്ടായിരുന്നുവെന്നും ആറുവർഷമായി നാട്ടിൽ പോയിട്ടെന്നും ബന്ധുകൾ പറഞ്ഞു. മൃതദേഹം റോയൽ ഒമാൻ പൊലീസ് മോർച്ചറിയിൽ സൂക്ഷിച്ചിരിക്കുകയാണ്. മാതാവ്: കദീസ കുട്ടി.
.
