സൗദിയിൽ ലോറി മറിഞ്ഞ് തീപിടിച്ചു; മലപ്പുറം കൊണ്ടോട്ടി സ്വദേശിക്ക് ദാരുണാന്ത്യം
സൗദിയിൽ ലോറി അപകടത്തിൽപ്പെട്ട് മലപ്പുറം കൊണ്ടോട്ടി സ്വദേശി മരിച്ചു. മുതുവല്ലൂർ നീറാട് കുണ്ടറക്കാടൻ വേണു (54) ആണ് മരിച്ചത്. ലോറി മറിഞ്ഞ ശേഷം തീ പിടിക്കുകയായിരുന്നു. ശനിയാഴ്ച രാത്രി യാമ്പു-ജിദ്ദ ഹൈവേയിലാണ് ദാരുണമായ അപകടം. വാണിജ്യ നഗരിയായ യാമ്പുവിൽനിന്ന് ജിദ്ദയിലേക്ക് സൗദി റെഡിമിക്സ് കമ്പനിയുടെ സിമന്റ് മിക്‌സറുമായി ഇദ്ദേഹം ഓടിച്ചിരുന്ന ലോറി മറ്റൊരു ട്രൈലറിന് പിറകിലിടിച്ചാണ് അപകടമുണ്ടായത്. ജിദ്ദയില്‍നിന്ന് 234 കിലോമീറ്റര്‍ അകലെ റാബഖിനടുത്ത് മസ്ദൂറ എന്ന സ്ഥലത്ത് വെച്ചാണ് അപകടമുണ്ടായത്.
അപകടത്തിൽ ലോറി പൂർണമായും കത്തി നശിച്ചു. വേണുവിന്റെ മൃതദേഹവും ഏറെക്കുറെ കത്തിക്കരിഞ്ഞ നിലയിലാണ്. മൃതദേഹം നാട്ടിലെത്തിച്ച് സംസ്‌കരിക്കാനുള്ള നടപടികൾ പുരോഗമിച്ചു വരികയാമെന്ന് ജിദ്ദ കെ.എം.സി.സി വെൽഫയർ വിങ് അറിയിച്ചു.
വാർത്തകൾ വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
