‘രാഷ്ട്രീയമില്ല, പ്രസക്തം കർഷകരുടെ വിഷയം, പറഞ്ഞതിൽ ഉറച്ച് നിൽക്കുന്നു’; വിശദീകരണവുമായി ജയസൂര്യ

മന്ത്രി നായകനാണെങ്കിലും അറിയുന്നത് വൈകിയായിരിക്കും. സിനിമ പരാജയപ്പെട്ടാല്‍ ഏറ്റവും അവസാനം അറിയുക നായകനായിരിക്കും എന്ന് പറഞ്ഞു കൊണ്ടാണ് ജയസൂര്യ കാര്യങ്ങള്‍ പറയുന്നത്. നെല്ല് സംഭരണവുമായി ബന്ധപ്പെട്ട വിഷയമാണ് അദ്ദേഹം സൂചിപ്പിക്കുന്നത്. മന്ത്രിയെ നോക്കിത്തന്നെയായിരുന്നു വിമര്‍ശനം. ഓണത്തിന് പട്ടിണികിടക്കുന്ന മാതാപിതാക്കളെ കണ്ടാല്‍ എങ്ങനെയാണ് പുതുതലമുറ കൃഷിയിലേക്ക് വരിക എന്ന ചോദ്യവും ചോദിക്കുന്നുണ്ട്. സര്‍ക്കാര്‍ ഇക്കാര്യത്തില്‍ ശക്തമായ നടപടി സ്വീകരിക്കണമെന്നും ജയസൂര്യ ആവശ്യപ്പെടുന്നുണ്ട്.

ഗുണനിലവാരം പരിശോധിക്കാനുള്ള സംവിധാനമാണ് സംസ്ഥാനത്ത് ആദ്യം വേണ്ടത് എന്നും ജയസൂര്യ ആവശ്യപ്പെടുന്നുണ്ട്. താന്‍ ഒരു സ്ഥലത്ത് പോയപ്പോള്‍ അവിടെ ഫസ്റ്റ് ക്വാളിറ്റി അരി ഉണ്ടായിരുന്നു. എന്നാല്‍ അത് കേരളത്തില്‍ വില്‍ക്കുന്നില്ല, പുറത്ത് കൊടുക്കുകയാണ് എന്നാണ് പറഞ്ഞത്. എന്താണെന്ന് ചോദിച്ചപ്പോള്‍ ഗുണനിലവാര പരിശോധന അടക്കമുള്ള കാര്യങ്ങള്‍ ഇവിടെ ഇല്ല എന്നായിരുന്നു മറുപടി എന്നും ജയസൂര്യ പറഞ്ഞു. ഗുണനിലവാര പരിശോധന ഇല്ലാത്തതുകൊണ്ട് തേര്‍ഡ് ക്വാളിറ്റി അരിയും വിഷം അടങ്ങിയ പച്ചക്കറികള്‍ കഴിക്കേണ്ട ഗതികേടിലാണ് നമ്മള്‍ ഇപ്പോള്‍ ഉള്ളത് എന്ന കാര്യവും അദ്ദേഹം സൂചിപ്പിക്കുന്നുണ്ട്.

‘പുതിയ തലമുറയിലുള്ള ചെറുപ്പക്കാര്‍ക്ക് വസ്ത്രത്തില്‍ ചെളിപുരളുന്നത് താത്പര്യമില്ല എന്നാണ് പറഞ്ഞത്. എന്നാല്‍ മനസ്സിലാക്കേണ്ട കാര്യം, തിരുവോണ ദിവസം പട്ടിണികിടക്കുന്ന അച്ഛനേയും അമ്മയേയും കണ്ട് എങ്ങനെയാണ് കൃഷിയിലേക്ക് വീണ്ടും ഒരു തലമുറ വരുന്നത്. നല്ല രീതിയില്‍ കാര്യങ്ങളൊക്കെ നടന്ന്, ഒരു കൃഷിക്കാരന്‍ ആണെന്ന അഭിമാനത്തോടെ പറയാന്‍ പറ്റുന്ന രീതിയില്‍ അച്ഛനും അമ്മയും ഉണ്ട് എന്നത് ഉദാഹരണമായി കാണിക്കാന്‍ ഉണ്ടെങ്കില്‍ മാത്രമേ ഒരു പുതിയ തലമുറ അതിലേക്ക് എത്തുകയുള്ളൂ. സര്‍ക്കാരിന്റെ ഭാഗത്ത് നിന്ന് നടപടികളുണ്ടാകണം’ – ജയസൂര്യ പറഞ്ഞു.

‘തെറ്റിദ്ധരിക്കരുത്. ഇതൊരു ഓര്‍മ്മപ്പെടുത്തല്‍ മാത്രമാണ്. ചിലപ്പോള്‍ ഇതെല്ലാം അങ്ങയുടെ ചെവിയിലേക്ക് എത്താന്‍ സമയമെടുക്കും. അതുകൊണ്ട് മാത്രമാണ് ഇത് പറഞ്ഞത്. ഇവനിതൊക്കെ അകത്തിരുന്ന് പറഞ്ഞാല്‍ പോരെ എന്ന് അദ്ദേഹം വിചാരിക്കും. എന്നാല്‍ അകത്തിരുന്ന പറയുമ്പോള്‍, സാറ് കേള്‍ക്കുന്ന ഒരുപാട് പ്രശ്‌നങ്ങളില്‍ ഒരു പ്രശ്‌നം മാത്രമായി മാറും. ഇത്രയും പേരുടെ മുമ്പില്‍ വെച്ച് പറയുമ്പോള്‍ ഗുരുതരമായിത്തന്നെ വിഷയത്തെ എടുക്കും എന്ന് വിശ്വസിച്ചു കൊണ്ടാണ് ഇത് പറയുന്നത്’- ജയസൂര്യ പറഞ്ഞു.

എന്നാൽ ജയസൂര്യ ജനങ്ങളുടെ മുമ്പില്‍ അഭിനയിക്കാന്‍ പാടില്ലായിരുന്നുവെന്ന് കൃഷിമന്ത്രി പി. പ്രസാദ് വിമര്‍ശിച്ചു. അദ്ദേഹം നല്ല നടനാണ്. നടനെ ആദരവോടെ കാണുന്നു. എന്നാല്‍ പൊതുവേദിയില്‍ ജനങ്ങളുടെ മുമ്പാകെ അഭിനയിക്കേണ്ട കാര്യമില്ലായിരുന്നു. അത് കേവലമായ നാട്യം മാത്രമായി. അതിന്റെ പിന്നില്‍ തീര്‍ച്ചയായും അജന്‍ഡയുണ്ട്. അതിന്റെ പിന്നില്‍ നല്ല തിരക്കഥയുണ്ട്. പക്ഷേ റിലീസായ അന്നുതന്നെ പടം പൊട്ടിപ്പോയി.

മന്ത്രി പി. രാജീവ് വേദിയില്‍ വെച്ചുതന്നെ ജയസൂര്യയ്ക്ക് മറുപടിനല്‍കിയതാണ്. അത് മാധ്യമങ്ങള്‍ കാണിച്ചില്ല. നടനും കര്‍ഷകനുമായ കൃഷ്ണപ്രസാദിന് പണം കിട്ടിയിട്ടില്ലെന്നാണ് ജയസൂര്യ പറഞ്ഞത്. താന്‍ കൃഷ്ണപ്രസാദിനെ നേരിട്ടുവിളിച്ചു. തന്റെ ഓഫീസില്‍നിന്ന് വിളിച്ചു. അദ്ദേഹം ഫോണെടുത്തില്ല. കൃഷ്ണപ്രസാദ് അടക്കമുള്ള കര്‍ഷകര്‍ക്കെല്ലാം മാസങ്ങള്‍ക്കുമുമ്പേ പണം കിട്ടിയിട്ടുണ്ടെന്നാണ് അറിയാന്‍ കഴിഞ്ഞത്. എത്ര കാപട്യമാണ് രംഗത്തിറക്കുന്നത്.

ഓരോ കിലോ നെല്ലിനും 7.80 രൂപ കേരളം കൊടുക്കുകയാണ്. കേന്ദ്രവിഹിതം 20.40 രൂപയാണ്. സംസ്ഥാനസര്‍ക്കാര്‍ നല്‍കേണ്ട തുക മുഴുവന്‍ കര്‍ഷകര്‍ക്ക് അക്കൗണ്ടില്‍ നല്‍കിക്കഴിഞ്ഞു. കേന്ദ്രവിഹിതം വൈകിയ ഘട്ടത്തില്‍ ബാങ്കുകളില്‍നിന്ന് പണം പലിശയ്ക്ക് കടമെടുക്കുകയാണ്. ബാങ്കുകള്‍ നിഷേധാത്മകമായ സമീപനം സ്വീകരിച്ചതാണ് പ്രശ്നമായത്. ക്രിയാത്മകമായ ഇടപെടലിന് മന്ത്രിസഭാ ഉപസമിതിയെ ചുമതലപ്പെടുത്തിയിട്ടുണ്ടെന്നും പി. പ്രസാദ് പറഞ്ഞു.

വാർത്തകൾ വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക