‘എനിക്കെതിരായ വധശ്രമത്തിൽ കേസ് എടുക്കാത്തത് മുഖ്യമന്ത്രി നിർദേശിച്ചിട്ട്; തെളിവ് നാളെ പുറത്തുവിടും’, നിലപാട് കടുപ്പിച്ച് ഗവർണർ

സംസ്ഥാന സര്‍ക്കാരിനും മുഖ്യമന്ത്രി പിണറായി വിജയനുമെതിരെയുള്ള പോരില്‍ നിന്ന് പിന്നോട്ടില്ലെന്ന് ആവര്‍ത്തിച്ച് ഗവര്‍ണര്‍ ആരിഫ് മുഹമ്മദ് ഖാന്‍. കേരളത്തിന്റെ മുഖ്യമന്ത്രിയെ ഓര്‍ത്ത് സഹതാപം മാത്രമേയുള്ളൂവെന്ന രൂക്ഷമായ പ്രതികരണമാണ് ഗവര്‍ണര്‍ നടത്തിയിരിക്കുന്നത്.

ഗവര്‍ണറെ ആക്രമിച്ചാല്‍ പരാതിയില്ലെങ്കിലും കേസെടുക്കണമെന്ന് അറിയാത്തവരാണോ നാട് ഭരിക്കുന്നതെന്ന് ഗവര്‍ണര്‍ ചോദിച്ചു. മുഖ്യമന്ത്രിയുടെ നിർദേശമുള്ളതിനാലാണ്, കണ്ണൂർ ചരിത്ര കോൺഗ്രസിൽ തനിക്കെതിരെ ആക്രമണം നടന്നിട്ടും പൊലീസ് കേസെടുക്കാതിരുന്നത്.മുഖ്യമന്ത്രിക്കെതിരായ വിഡിയോയും കത്തുകളും നാളെ പുറത്തുവിടും. മുഖ്യമന്ത്രി പല ആനുകൂല്യങ്ങളും തന്നിൽനിന്ന‌ു തേടിയിട്ടുണ്ട്, അത് പുറത്തുവിടില്ലെന്നും ഗവർണർ പറഞ്ഞു.

തന്നെ ഭയപ്പെടുത്താനും സമ്മർദത്തിലാക്കാനും മുഖ്യമന്ത്രി എല്ലാ കളിയും കളിക്കുകയാണെന്നു കഴിഞ്ഞദിവസം ഗവർണർ ആരോപിച്ചിരുന്നു. 3 വർഷം മുൻപു കണ്ണൂരിൽ ചരിത്ര കോൺഗ്രസിനിടെ തനിക്കെതിരെ നടന്ന വധശ്രമത്തിനു പിന്നിൽ ഗൂഢാലോചനയുണ്ടെന്നു കുറ്റപ്പെടുത്തിയ ഗവർണർ, അതിൽ കേരളത്തിലെ അധികാരകേന്ദ്രവും ഭാഗമാണെന്നു പരോക്ഷമായി പറഞ്ഞു. ഇതുവരെ പകരക്കാരെ ഉപയോഗിച്ചു കളിച്ച മുഖ്യമന്ത്രി ഇപ്പോൾ മറനീക്കി പുറത്തുവന്നതിൽ സന്തോഷമുണ്ട്. ‌ഭരണഘടനാപരമായ ചുമതലകൾ നിർവഹിക്കണമെന്നാവശ്യപ്പെട്ട് 3 വർഷമായി താനെഴുതുന്ന കത്തുകൾക്കു മുഖ്യമന്ത്രി മറുപടി തരുന്നില്ലെന്നും ഗവർണർ പറഞ്ഞു.