നടിയെ ബലാത്സംഗം ചെയ്തു, ചിത്രങ്ങൾ പകർത്തി; ട്രെയിനർ അറസ്റ്റിൽ

മുംബൈ: വിവാഹവാഗ്ദാനം നൽകി തെലുങ്ക് നടിയെ ലൈംഗികമായി പീഡിപ്പിക്കുകയും സ്വകാര്യ ചിത്രങ്ങൾ പകർത്തുകയും ചെയ്ത ഫിറ്റ്നസ് ട്രെയിനർ അറസ്റ്റിൽ. നടിയുടെ പരാതിയിൽ ആദിത്യ കപൂർ എന്ന യുവാവിനെതിരെയാണ് മുംബൈ പോലീസ് കേസെടുത്തത്.

പ്രതി പ്രണയം നടിച്ച് ബന്ധം സ്ഥാപിക്കുകയും ബലാത്സംഗം ചെയ്യുകയുമായിരുന്നുവെന്ന് സൗത്ത് മുംബൈയിലെ കഫെ പരേഡ് പോലീസിൽ നൽകിയ പരാതിയിൽ നടി വ്യക്തമാക്കുന്നുണ്ട്. വിവാഹം കഴിക്കണമെന്ന ആവശ്യം നിരസിച്ച പ്രതി ശാരീരികമായി ഉപദ്രവിക്കുകയും ഫോണിൽ പകർത്തിയ സ്വകാര്യ ചിത്രങ്ങൾ പ്രചരിപ്പിക്കുമെന്ന് ഭീഷണിപ്പെടുത്തുകയുമായിരുന്നുവെന്ന് പരാതിയിൽ വ്യക്തമാക്കുന്നുണ്ട്.

സ്വകാര്യ ചിത്രങ്ങൾ കൈവശപ്പെടുത്തിയ ആദിത്യ കപൂർ കൊല്ലുമെന്ന് ഭീഷണിപ്പെടുത്തിയതായി നടി പരാതിയിൽ പറയുന്നുണ്ട്. നടിയുടെ പരാതിയിൽ കേസെടുത്ത പോലീസ് ചൊവ്വാഴ്ച പ്രതിയെ അറസ്റ്റ് ചെയ്തു. കേസിൽ വിശദമായ അന്വേഷണം നടത്തുമെന്ന് പോലീസ് അറിയിച്ചു.

ഇൻഫർമേഷൻ ടെക്‌നോളജി (ഐടി) നിയമത്തിലെ 376, 323, 504, 506 (2), 67, 67 എ എന്നീ വകുപ്പുകൾ പ്രകാരമാണ് ഇയാൾക്കെതിരെ കേസെടുത്തിരിക്കുന്നത്. 2016 മുതൽ തെലുങ്ക് സിനിമകളിൽ സജീവമായിരുന്ന നടി നിരവധി ചിത്രങ്ങളിൽ അഭിനയിച്ചിട്ടുണ്ട്.