‘UAE-യിൽ മഴ വീണ്ടും വരും’; മുന്നറിയിപ്പുമായി കാലാവസ്ഥാ നിരീക്ഷണകേന്ദ്രം, നേരിടാൻ സജ്ജമെന്ന് അധികൃതർ, വിമാനങ്ങൾക്ക് നിയന്ത്രണം ഏർപ്പെടുത്തി
ദുബായ്: യു.എ.ഇയില്‍ മഴ വീണ്ടുമെത്തുമെന്ന മുന്നറിയിപ്പുമായി ദേശീയ കാലാവസ്ഥാ നിരീക്ഷണകേന്ദ്രം. തിങ്കള്‍, ചൊവ്വ ദിവസങ്ങളില്‍ വീണ്ടും മഴ പെയ്യുമെന്നാണ് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയത്.
തിങ്കളാഴ്ച നേരിയ മഴയ്ക്കും ചൊവ്വാഴ്ച ശക്തമായ ഒറ്റപ്പെട്ട മഴയ്ക്കുമാണ് സാധ്യത. ഇടിമിന്നലോടുകൂടിയ ശക്തമായ കാറ്റിനും സാധ്യതയുണ്ട്.
മഴക്കെടുതി പരിഹരിക്കുന്നതിന്റെ ഭാഗമായാണ് നിയന്ത്രണം ഏര്‍പ്പെടുത്തിയിരിക്കുന്നത്. എന്നാല്‍, വിമാനങ്ങള്‍ പുറപ്പെടുന്നതിന് നിയന്ത്രണം തടസ്സമാകില്ല.
എയര്‍ ഇന്ത്യ ദുബായ് സര്‍വീസുകള്‍ റദ്ദാക്കിയിട്ടുണ്ട്. എയര്‍ ഇന്ത്യ എക്സ്പ്രസ് സര്‍വീസുകളെ നിയന്ത്രണം ബാധിച്ചേക്കില്ല. ഈ മാസം 21 വരെ ടിക്കറ്റ് എടുത്തവര്‍ക്ക് മാറ്റി നല്‍കും.
കേരളത്തില്‍ കൊച്ചിയില്‍നിന്ന് മാത്രമാണ് എയര്‍ഇന്ത്യ ദുബായ് സര്‍വീസ് നടത്തുന്നത്. സ്പൈസ് ജെറ്റ് ദുബായ് സര്‍വീസുകള്‍ ഫുജൈറയിലേക്ക് മാറ്റിയിട്ടുണ്ട്. ഡല്‍ഹി, അഹമ്മദാബാദ്, പുണെ, മുംബൈ വിമാനങ്ങള്‍ ദുബായ്ക്ക് പകരം ഫുജൈറ വഴിയാക്കും.
ഇന്ത്യക്കാര്‍ ദുബായ് വഴിയുള്ള വിമാനയാത്ര മാറ്റിവെക്കണമെന്ന് യു.എ.ഇ. ഇന്ത്യന്‍ എംബസി അറിയിച്ചു. ദുബായ് വിമാനത്താവളത്തില്‍ കുടുങ്ങിയവര്‍ക്ക് ഇന്ത്യന്‍ എംബസിയുടെ സഹായത്തിന് വിളിക്കാം. ഫോണ്‍ 00971 50 1205172, 0097156 9950590, 00971 50 7347676, 00971 58 5754213.
