ഉംറ കഴിഞ്ഞ് മടങ്ങവേ കാർ അപകടത്തിൽപ്പെട്ടു; ഒരു കുടുംബത്തിലെ അഞ്ച് പേർ മരിച്ചു, ഒരാൾക്ക് പരിക്കേറ്റു
മക്കയിൽ നിന്ന് ഉംറ കഴിഞ്ഞ് മടങ്ങവേ കാർ അപകടത്തിൽപ്പെട്ട് ഒരു കുടുംബത്തിലെ അഞ്ച് പേർ മരിച്ചു. ഒരാൾക്ക് പരിക്കേൽക്കുകയും ചെയ്തു. ജോര്‍ദാന്‍ പൗരനായ മാലിക് അക്രം, മക്കളായ അക്രം, മായ, ദാന, ദീമ എന്നിവരാണ് മരിച്ചത്. അപകടത്തിൽ പരിക്കേറ്റ ഇദ്ദേഹത്തിന്റെ ഭാര്യ അപകടനില തരണം ചെയ്തിട്ടുണ്ട്. മക്ക-റിയാദ് റോഡിൽ വെച്ചാണ് അപകടമുണ്ടായത്. യുഎഇയില്‍ നിന്ന് ഉംറ നിര്‍വഹിക്കാനെത്തി തിരിച്ചുപോകുന്നതിനിടെയായിരുന്നു അപകടം.
തിങ്കളാഴ്ചയാണ് അപകടം നടന്നതെന്ന് പ്രാദേശിക മാധ്യമങ്ങളിൽ റിപ്പോർട്ട് ചെയ്തു. ജോർദാനിയായ മാലിക് യുഎഇയിലാണ് ജോലി ചെയ്യുന്നത്. ഇവർ സഞ്ചരിച്ചിരുന്ന കാര്‍ മറിഞ്ഞാണ് അപകടം. അപകടത്തില്‍ കാര്‍ പൂര്‍ണമായും തകര്‍ന്നു. ആളുകൾ എത്തിയാണ് എല്ലാവരെയും കാറില്‍ നിന്ന് പുറത്തെടുത്തത്. മരിച്ചവരെയും പരിക്കേറ്റവരെയും ഹുഫൂഫിലെ കിംഗ് ഫഹദ് ആശുപത്രിയിലേക്ക് മാറ്റിയതായി ജോര്‍ദാന്‍ എംബസി അറിയിച്ചു.
വാർത്തകൾ വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
