പൈപ്പിൽനിന്ന് വെള്ളമെടുക്കുന്നതിനെച്ചൊല്ലി കുടുംബവഴക്ക്; തിരുവനന്തപുരത്ത് പ്രാദേശിക കോൺഗ്രസ് നേതാവ് വെട്ടേറ്റ് മരിച്ചു

ശനിയാഴ്ച രാത്രി പത്തുമണിയോടെയാണ് സാമിന് നേരേ ആക്രമണമുണ്ടായത്. കുടുംബവഴക്കാണ് ആക്രമണത്തിലും കൊലപാതകത്തിലും കലാശിച്ചത്. സാമും ബന്ധുക്കളും തമ്മില്‍ നേരത്തെ തര്‍ക്കങ്ങളുണ്ടായിരുന്നതായാണ് വിവരം. ശനിയാഴ്ച രാത്രി ഒത്തുതീര്‍പ്പ് ചര്‍ച്ചയ്ക്കായി സാമിനെ വിളിച്ചുവരുത്തിയ ബന്ധുക്കള്‍, ആസൂത്രിതമായി ആക്രമിച്ചെന്നാണ് ആരോപണം. തുടര്‍ന്ന് തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചെങ്കിലും ഞായറാഴ്ച മരണം സംഭവിക്കുകയായിരുന്നു.

ഒരു സ്ത്രീയാണ് വടി കൊണ്ട് സാമിനെ ആദ്യം തലയ്ക്കടിച്ചതെന്നായിരുന്നു ദൃക്‌സാക്ഷിയുടെ പ്രതികരണം. ഇതിനിടെ പിന്നിലൂടെ എത്തിയ മറ്റൊരാള്‍ സാമിന്റെ തലയ്ക്ക് വെട്ടി. പിന്നാലെ തുടരെ തലയ്ക്ക് വെട്ടിപരിക്കേല്‍പ്പിച്ചെന്നും ദൃക്‌സാക്ഷി പറഞ്ഞു.

അതിനിടെ, സംഭവത്തില്‍ പോലീസ് പ്രതികളുമായി ഒത്തുകളിക്കുകയാണെന്ന് കോണ്‍ഗ്രസും നാട്ടുകാരും ആരോപിക്കുന്നുണ്ട്. വെട്ടേറ്റ് ബോധരഹിതനായി കിടക്കുന്നത് കണ്ട് നാട്ടുകാര്‍ അറിയിച്ചിട്ടും പോലീസ് ഇടപെട്ടില്ലെന്നും മരണം സംഭവിച്ചിട്ട് പോലീസുകാര്‍ ആശുപത്രിയില്‍ എത്തിയില്ലെന്നുമാണ് കോണ്‍ഗ്രസ് നേതാക്കളുടെ ആരോപണം. ആശുപത്രിയില്‍നിന്ന് വിവരം നല്‍കിയതിന് ശേഷവും പോലീസ് വന്നില്ലെന്നാണ് ഇവര്‍ പറയുന്നത്.

അതേസമയം, സാമിനെ ആക്രമിച്ച് കൊലപ്പെടുത്തിയ സംഭവത്തില്‍ ബന്ധുക്കളായ രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്. ഇവരുടെ അറസ്റ്റ് രേഖപ്പെടുത്തിയിട്ടില്ല.

കാട്ടാക്കട സ്വദേശിയായ സാം, കർഷക കോൺഗ്രസ് മുൻ നിയോജക മണ്ഡലം പ്രസിഡന്റായിരുന്നു.

വാർത്തകൾ വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക