ഹൈദരാബാദിലേക്കുളള എയർ ഇന്ത്യ വിമാനം ചവറ പാലത്തിൽ കുടുങ്ങി; ഹൈദരാബാദിലെത്താൻ 20 ദിവസമെടുക്കും

ആന്ധ്ര സ്വദേശിയായ സ്വകാര്യ വ്യക്തി ലേലത്തിൽ എടുത്തതാണ് ഉപയോഗ ശൂന്യമായ ഈ വിമാനം. ലോറിയിൽ ഹൈദരാബാദിൽ എത്തിച്ചു ഭക്ഷണശാലയാക്കി മാറ്റും. രണ്ടുദിവസം മുൻപാണു വലിയ കണ്ടെയ്നർ ലോറിയിൽ വിമാനം കയറ്റി യാത്ര ആരംഭിച്ചത്. വിമാനത്തിന്റെ വശങ്ങളിലെയും മുകളിലെയും ചിറകുകളും സമാനമായ മറ്റൊരു വാഹനത്തിൽ  കൊണ്ടുപോകുന്നുണ്ട്. തിരുവനന്തപുരത്തിനു സമീപം   ഈ വാഹനത്തിൽ ബസ് ഇടിച്ച് അപകടമുണ്ടായതിനാലാണ് അതിന്റെ യാത്ര വൈകിയിരുന്നു.

ഇന്നലെ പുലർച്ചെയോടെയാണു ബൈപാസിൽ കുരീപ്പുഴ ടോൾ പ്ലാസയുടെ സമീപം വിമാനം എത്തിയ ലോറി നിർത്തിയിട്ടത്. തുടർന്ന് വൈകിട്ടോടെയാണ് യാത്ര പുനരാരംഭിച്ചത്. രാത്രി സമയത്ത് മാത്രമാണ് ഓടുന്നത്. 30 കിലോമീറ്റർ വേഗതയിലാണു  സഞ്ചരിക്കുന്നത്. തുടർന്ന് അനുയോജ്യമായ സ്ഥലത്ത് പാർക്ക് ചെയ്യും. ഹൈദരാബാദിലെത്താൻ 20 ദിവസം വേണ്ടി വരുമെന്നും ജീവനക്കാർ പറഞ്ഞു.

ഇതിനിടെ കൊച്ചിയിലേക്കുള്ള യാത്രക്കിടെ വിമാനം ചവറ പാലത്തിൽ കുടുങ്ങി. തിരുവനന്തപുരത്തുനിന്ന്‌ വിമാനവും വഹിച്ചെത്തിയ ട്രെയിലർ ലോറിയുടെ ടയർ പഞ്ചറായി ചവറ പാലത്തിൽ കുടുങ്ങുകയായിരുന്നു.