സൗദിയിൽ മലയാളി ഹൃദയാഘാതം മൂലം ഉറക്കത്തിൽ മരിച്ചു
സൌദിയിലെ ദമ്മാമിൽ മലയാളി പ്രവാസി ഉറക്കത്തിൽ മരിച്ചു. ഹൃദയാഘാതമാണ് മരണ കാരണം. കൊല്ലം, കടക്കൽ, പാലങ്ങാട് സ്വദേശി പൂരം വീട്ടിൽ രാധാകൃഷ്ണൻ ആണ് മരിച്ചത്. 60 വയസ്സായിരുന്നു. നേരത്തെ 25 വർഷത്തോളം ഹൌസ് ഡ്രൈവറായി ഖത്തീഫിലെ മുഹമ്മദിയ്യയില്ർ ജോലി ചെയ്തിരുന്നു. പിന്നീട് പത്ത് വർഷം മുമ്പ് നാട്ടിലേക്ക് എക്സിറ്റിൽ പോകുകയും പുതിയ വിസയിലെത്തി ഷിപ്പിങ് കമ്പനിയിൽ ഡൈന ഡ്രൈവറായി ജോലിയിൽ പ്രവേശിക്കുകയുമായിരുന്നു.
പതിവുപോലെ രാത്രിയിലും സുഹൃത്തുക്കളുമൊത്ത് കളിതമാശകൾ പറഞ്ഞിരുന്നതിന് ശേഷമാണ് ഉറങ്ങാൻ പോയത്. റൂമിൽ താമസിച്ചിരുന്ന ആൾ രാവിലെ ആറിന് തന്നെ ജോലിക്ക് പോയിരുന്നു. രാധാകൃഷ്ണന് എട്ട് മണിമുതലാണ് ജോലി. സമയം കഴിഞ്ഞിട്ടും ജോലിക്കെത്താത്തതിനെ തുടർന്ന് നടത്തിയ അന്വോഷണത്തിലാണ് കട്ടിലിൽ മരിച്ച നിലയിൽ കണ്ടെത്തിയത്. മൃതദേഹം നാട്ടിൽ കൊണ്ടുപോകുന്നതിനുള്ള നടപടിക്രമങ്ങൾ സാമൂഹിക പ്രവർത്തകൻ നാസ് വക്കത്തിന്‍റെ നേതൃത്വത്തിൽ പുരോഗമിക്കുകയാണ്. രാധികയാണ് ഭാര്യ. രമ്യ രാധാകൃഷ്ണൻ, രാഹുൽ രാധാകൃഷ്ണൻ എന്നിവർ മക്കളാണ്.
