ജിദ്ദ സീസണ്‍; വിനോദ പരിപാടികള്‍ ഇന്ന് പുനരാരംഭിക്കും
ജിദ്ദ: ജിദ്ദ സീസണ്‍ ഫെസ്റ്റിവലിന്‍റെ ഭാഗമായി നഗരത്തിന്‍റെ വിവിധ ഭാഗങ്ങളില്‍ നടക്കുന്ന വിനോദ പരിപാടികള്‍ ഇന്ന് പുനരാരംഭിക്കും. യു.എ.ഇ പ്രസിഡന്‍റ് ശൈഖ് ഖലീഫ ബിന്‍ സായിദ് അല്‍ നഹിയാന്‍റെ നിര്യാണത്തെ തുടര്‍ന്നു 3 ദിവസത്തെ ദുഖാചരണം പ്രഖ്യാപിച്ചതിനാല്‍ കഴിഞ്ഞ 3 ദിവസം വിനോദ പരിപാടികള്‍ മാറ്റി വെച്ചിരുന്നു. ഇന്ന് മുതല്‍ പരിപാടികള്‍ പുനരാരംഭിക്കുമെന്ന് അധികൃതര്‍ അറിയിച്ചു.
9 വേദികളില്‍ പലതിലേക്കും കഴിഞ്ഞ 3 ദിവസം സന്ദര്‍ശകര്‍ക്ക് പ്രവേശനം ഉണ്ടായിരുന്നെങ്കിലും സംഗീത പരിപാടികള്‍ ഉള്‍പ്പെടെയുള്ള വിനോദ പരിപാടികള്‍ ഉണ്ടായിരുന്നില്ല. അമീര്‍ മാജിദ് പാര്‍ക്കില്‍ കഴിഞ്ഞ വെള്ളിയാഴ്ച നിശ്ചയിച്ചിരുന്ന ഇന്ത്യന്‍ പരിപാടിയും മാറ്റി വെച്ചവയുടെ കൂട്ടത്തിലുണ്ട്. ഇന്ത്യന്‍ പരിപാടിയുടെ പുതിയ തിയ്യതി പ്രഖ്യാപിച്ചിട്ടില്ല. അമീര്‍ മാജിദ് പാര്‍ക്കില്‍ ഇന്ന് വിനോദ പരിപാടികള്‍ പുനരാരംഭിക്കുന്നതിനാല്‍ അടുത്ത 4 വെള്ളിയാഴ്ചകളില്‍ നടക്കുന്ന പാകിസ്ഥാന്‍, ബങ്ഗ്ലാദേശ്, ഇന്തോനേഷ്യ, ഫിലിപ്പൈന്‍സ് എന്നീ രാജ്യങ്ങളുടെ ഈവന്റുകള്‍ക്ക് മാറ്റമുണ്ടാകില്ല. സെര്‍ക് ഡ്യൂ സൊലെയില്‍ സര്‍ക്കസ് ഉള്‍പ്പെടെയുള്ള പരിപാടികളും ഇന്ന് പുനരാരംഭിക്കും.
