കമ്പനി പങ്കാളിയെന്ന് തെറ്റിദ്ധരിപ്പിച്ചു, കുവൈത്തി പൗരനെ കബളിപ്പിച്ച് 12,000 ദിനാർ തട്ടിയെടുത്തു, പ്രവാസി അറസ്റ്റിൽ
കുവൈത്ത് സിറ്റി: കുവൈത്തിൽ കമ്പനിയിലെ പങ്കാളിയാണെന്ന് തെറ്റിദ്ധരിപ്പിച്ച് 12,000 ദിനാർ തട്ടിയെടുത്ത പ്രവാസി അറസ്റ്റിൽ. ഒരു കുവൈത്തി പൗരനെ കബളിപ്പിച്ചാണ് പണം തട്ടിയെടുത്തത്. കമ്പനിക്ക് വേണ്ടി കരാറുകളിൽ ഒപ്പിടാൻ തനിക്ക് അധികാരമുണ്ടെന്ന് പ്രവാസി കുവൈത്തി പൗരനെ വിശ്വസിപ്പിച്ചാണ് പണം തട്ടിയെടുത്തത്. വാഗ്ദാനം ചെയ്ത ജോലി പൂർത്തിയാക്കാതെ ഇയാൾ 12,000 ദിനാർ കൈപ്പറ്റുകയായിരുന്നു.
തട്ടിപ്പിന് ഇരയായ വ്യക്തി മൈദാൻ ഹവല്ലി പൊലീസ് സ്റ്റേഷനിൽ പരാതി നൽകി. പ്രതി സ്വയം ഒരു കരാർ കമ്പനിയുടെ പങ്കാളിയായി തെറ്റിദ്ധരിപ്പിച്ചതായും തൻ്റെ വഞ്ചനാപരമായ പ്രവർത്തനങ്ങൾ വ്യക്തമാക്കിയതായും പരാതിയിൽ പറയുന്നു. കേസ് ഹവല്ലി ഇൻവെസ്റ്റിഗേഷൻസ് വിഭാഗത്തിന് കൈമാറി. പ്രതി സ്വമേധയാ അന്വേഷണ ഉദ്യോഗസ്ഥർക്ക് മുന്നിൽ ഹാജരായി. ചോദ്യം ചെയ്യലിൽ, പ്രതി താൻ തട്ടിപ്പും വഞ്ചനയും നടത്തിയതായി സമ്മതിച്ചു. പരാതിക്കാരനുമായി കരാറിൽ ഏർപ്പെട്ടതായും, അൽ-ശാബ് പ്രദേശത്തുള്ള അദ്ദേഹത്തിൻ്റെ വസതിയിൽ അലങ്കാരം , അലുമിനിയം, വാതിലുകൾ എന്നിവയുടെ ജോലികൾക്കായി 12,000 ദിനാർ കൈപ്പറ്റിയതായും ഇയാൾ സമ്മതിച്ചു. കേസിൽ തുടർനടപടികൾക്കായി അന്വേഷണ വിഭാഗം പ്രതിയെ കസ്റ്റഡിയിലെടുത്തു.
