ആശുപത്രിയിൽ പരിശോധന; 19 മലയാളി നഴ്സുമാർ ഉൾപ്പെടെ 60 ഓളം ജീവനക്കാർ കുവൈത്തിൽ ജയിലിൽ; അറസ്റ്റിലായവരിൽ കൈക്കുഞ്ഞുങ്ങളുടെ അമ്മമാരും
19 മലയാളി നഴ്സുമാരുൾപ്പെടെ അറുപതോളം ആശുപത്രി ജീവനക്കാരെയാണ് കുവൈത്തിലെ സ്വകാര്യ ആശുപത്രിയിൽ നിന്ന് പിടികൂടിയത്. ആഭ്യന്തര മന്ത്രാലയവും, തൊഴിൽ, ആരോഗ്യ മന്ത്രലയങ്ങളും സംയുക്തമായി നടത്തിയ പരിശോധനയിലാണ് ഇവർ പിടിയിലായത്. ഇവരിൽ 30 ഓളം പേർ ഇന്ത്യക്കാരാണ്. ഇന്ത്യക്കാർക്ക് പുറമേ ഫിലിപ്പീൻസ്, ഈജിപ്ത്, ഇറാൻ എന്നീ രാജ്യങ്ങളിൽ നിന്നുള്ളവരും പിടിയിലായവരിലുണ്ട്.
പരിശോധനയിൽ അനുവദിച്ചതിൽ കൂടുതൽ ജീവനക്കാർ ജോലി ചെയ്യുന്നതായി കണ്ടെത്തിയെന്ന് അധികൃതർ വ്യക്തമാക്കി. കൂടാതെ കോസ്മറ്റിക് വിഭാഗത്തിലെ ഹെയർ ട്രാൻസ്പ്ലാൻ്റേഷൻ, ഓപ്പറേഷൻ തിയേറ്റർ എന്നിവയിൽ ലൈസൻസില്ലാത്ത ജീവനക്കാർ ജോലി ചെയ്യുന്നതായും കണ്ടെത്തി. പിടിയിലായവരിൽ പലരും വീട്ടു ജോലിക്കാരും കുടുംബ വിസയിലുള്ളവരുമാണ്. എന്നാൽ വർഷങ്ങളായി നിയമാനുസൃതം ഈ സ്ഥാപനത്തിൽ ജോലി ചെയ്യുന്നവരും പിടിയിലായിട്ടുണ്ടെന്നാണ് ബന്ധുക്കൾ ആരോപിക്കുന്നത്.
ഒരു മാസം മുതൽ പ്രായമുളള നവജാത ശിശുക്കളുടെ അമ്മമാർ തടവിലായവരിലുണ്ട്. മുലയൂട്ടുന്ന അമ്മമാരായ 5 മലയാളി നഴ്സുമാർ അറസ്റ്റിലായവരിൽ ഉണ്ട്. ഇക്കൂട്ടത്തിൽ പ്രസാവവധി കഴിഞ്ഞ് അന്ന് ജോലിയിൽ പ്രവേശിച്ച യുവതിയും ഉൾപ്പെടും. കഴിഞ്ഞ ആറ് ദിവസമായി ഇവർ തടവിൽ കഴിയുകയാണ്. ഇവരുടെ മോചനത്തിനായി വിദേശകാര്യ സഹമന്ത്രി വി. മുരളീധരനും, ഇന്ത്യൻ എംബസിയും ഇടപെലുകൾ നടത്തി വരികയാണ്. ഇതിലൂടെ കുഞ്ഞുങ്ങളെ മുലയൂട്ടാൻ അനുമതി നൽകിയതായി ബന്ധുക്കൾ അറിയിച്ചു.
അതേ സമയം പിടിയിലായ മലയാളി നഴ്സുമാരെല്ലാം സ്ഥാപനത്തിൽ നിയമാനുസൃതം ജോലി ചെയ്തിരുന്നവരാണെന്നു ബന്ധുക്കൾ പറയുന്നു. എല്ലാവർക്കും കാലാവധിയുള്ള വീസയും സ്ഥാപനത്തിന്റെ സ്പോൺസർഷിപ്പും ഉണ്ട്. പലരും 3 മുതൽ 10 വർഷം വരെയായി ഇതേ ആശുപത്രിയിൽ ജോലി ചെയ്യുന്നവരാണ്.
ഇറാൻ സ്വദേശിയുടെ ഉടമസ്ഥതയിലുള്ളതാണ് ആശുപത്രി. നല്ല രീതിയിൽ നടന്നിരുന്ന ആശുപത്രിയിൽ അടുത്തിടെ സ്പോൺസറും ആശുപത്രിയുടെ ഉടമയും തമ്മിലുണ്ടായ തർക്കമാണ് അറസ്റ്റിലേക്കു നയിച്ചതെന്നാണു ബന്ധുക്കൾക്കു ലഭിച്ച വിവരം.
ഇന്ത്യൻ എംബസിയും കേന്ദ്ര സർക്കാരും അടിയന്തരമായി ഇടപെട്ടു നഴ്സുമാരുടെ മോചനത്തിനുള്ള നടപടികൾ കൈക്കൊള്ളണം എന്നാണ് ബന്ധുക്കളുടെ ആവശ്യം. അതേ സമയം ഇവരെ നാട് കടത്തൽ കേന്ദ്രത്തിലേക്ക് മാറ്റിയതായും സ്ഥിരീകരിക്കാത്ത റിപ്പോർട്ടുകളുണ്ട്.
വാർത്തകൾ വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
