‘ഞാനിപ്പോഴും സ്‌നേഹിക്കുന്നു, പുതുജീവിതം തുടങ്ങാം, മക്കളേയും കൂട്ടി മടങ്ങിവരൂ’; ഇന്ത്യയിലുള്ള പാക്‌ യുവതിയോട് ഭര്‍ത്താവ്

“ഞാനെത്രത്തോളം നിന്നെ സ്‌നേഹിക്കുന്നുണ്ടെന്ന് നിനക്ക് നന്നായറിയില്ലേ? അവിടെ നിനക്ക് എന്തെങ്കിലും അപകടമുണ്ടായാല്‍ നമ്മുടെ മക്കള്‍ക്ക് എന്തുസംഭവിക്കുമെന്ന് നീയൊന്ന് ചിന്തിച്ചുനോക്കൂ, ആരവരുടെ ഉത്തരവാദിത്വം ഏറ്റെടുക്കും? അവര്‍ക്കുവേണ്ടി നീ മടങ്ങിവരൂ. നിന്നെയും കുഞ്ഞുങ്ങളേയും എനിക്ക് വല്ലാതെ മിസ് ചെയ്യുന്നുണ്ട്. ആരും നിന്നോട് ഒന്നും പറയില്ല. നമുക്ക് പുതിയൊരു ജീവിതം തുടങ്ങാം”, ഗുലാം പറഞ്ഞു. സീമയുടെ സ്വഭാവം വളരെ നല്ലതാണെന്നും അയാള്‍ കൂട്ടിച്ചേര്‍ത്തു.

സീമയ്ക്ക് വേണ്ടിയാണ് തന്റെ ആദ്യഭാര്യയെ ഉപേക്ഷിച്ചതെന്ന് വെളിപ്പെടുത്തിയ ഗുലാം മാസംതോറും സീമയ്ക്കും മക്കള്‍ക്കും വേണ്ടി 80,000-90,000 രൂപ അയക്കുമായിരുന്നുവെന്നും പറഞ്ഞതായി ഒരു ദേശീയ മാധ്യമം റിപ്പോര്‍ട്ട് ചെയ്തു. അതേസമയം, സീമയേയും സച്ചിന്‍ മീണയേയും ഉത്തര്‍പ്രദേശ് എടിഎസ് ചോദ്യം ചെയ്യാനായി തിങ്കളാഴ്ച കസ്റ്റഡിയിലെടുത്തു.

അതേ സമയം പാകിസ്താനി യുവതി സീമ ഹൈദറിനെതിരെ ‘ഗോരക്ഷാ ഹിന്ദുദള്‍’ എന്ന പേരിലുള്ള സംഘടന ഭീഷണിയുമായി രംഗത്തെത്തി.  72 മണിക്കൂറിനുള്ളില്‍ സീമ ഹൈദര്‍ ഇന്ത്യവിടണമെന്നാണ് ഇവരുടെ അന്ത്യശാസനം. അല്ലെങ്കില്‍ വന്‍ പ്രക്ഷോഭം സംഘടിപ്പിക്കുമെന്നും ഗോരക്ഷാ ഹിന്ദുദള്‍ ദേശീയ പ്രസിഡന്റ് വേദ് നഗര്‍ വീഡിയോ സന്ദേശത്തില്‍ പറഞ്ഞു.