ജിദ്ദയിൽ വിഖായ രക്ത ദാന ക്യാമ്പ് സംഘടിപ്പിച്ചു
ജിദ്ദ: സഊദി ദേശീയ ദിനം പ്രമാണിച്ചു സമസ്ത ഇസ്‌ലാമിക് സെന്റർ ജിദ്ദ സെൻട്രൽ കമ്മിറ്റിക്ക് കീഴിലുള്ള വിഖായ പ്രവർത്തകർ രക്ത ദാന ക്യാമ്പ് സംഘടിപ്പിച്ചു. രണ്ട് ദിവസങ്ങളിലായി നടത്തിയ രക്തദാന ക്യാമ്പിൽ നിരവധി പ്രവർത്തകർ രക്തദാനം നടത്തി.
സഊദി ദേശീയ ദിനമായ വെള്ളിയാഴ്ച ജിദ്ദ കിംഗ് ഫഹദ് ആശുപത്രിയിലും ഞായറാഴ്ച ജിദ്ദ ജാമിഅ: മെഡിക്കൽ കോളേജ് ആശുപത്രിയിലുമാണ് വിഖായയുടെ ആഭിമുഖ്യത്തിൽ രക്തദാന ക്യാമ്പുകൾ സംഘടിപ്പിച്ചത്. ക്യാമ്പിൽ പങ്കെടുക്കുന്നവരുടെ സൗകര്യത്തിന് വേണ്ടി മുൻകൂട്ടി രജിസ്റ്റർ ചെയ്യാൻ അവസരം ഒരുക്കിയിരുന്നു.
ജിദ്ദയിൽ സംഘടിപ്പിച്ച രക്തദാന ക്യാമ്പുകൾക്ക് എസ് ഐ സി ജിദ്ദ സെൻട്രൽ കമ്മിറ്റി പ്രസിഡന്റ്‌ സയ്യിദ് അൻവർ തങ്ങൾ, ജനറൽ സെക്രട്ടറി അബൂബക്കർ ദാരിമി ആലമ്പാടി, സുബൈർ ഹുദവി പട്ടാമ്പി, വിഖായ സഊദി നാഷണൽ കൺവീനർ ദിൽഷാദ് തലാപ്പിൽ, വിഖായ ജിദ്ദ ചെയർമാൻ ഷബീർ ഊരകം, നാസർ തവലേങ്ങൽ, ജാബിർ നാദാപുരം, സലീം മണ്ണാർക്കാട്, ഷാഹിദ്, ഷൗക്കത്ത്, സാലിം അമ്മിനിക്കാട്, ഷബീർ മോങ്ങം തുടങ്ങിയവർ നേതൃത്വം നൽകി. കഴിഞ്ഞ വർഷവും സഊദി ദേശീയ ദിനത്തിൽ വിഖായ പ്രവർത്തകർ രക്തദാനം നടത്തിയിരുന്നു.
കൂടുതൽ വാർത്തകൾക്ക് വാട്സ് ആപ്പ് ഗ്രൂപ്പിൽ അംഗമാകാൻ ഇവിടെ ക്ലിക്ക് ചെയ്യുക
