പണിക്കൂലി നൽകിയില്ല; മുതലാളിയുടെ ബെൻസ് കാർ കത്തിച്ച് യുവാവ് – വീഡിയോ
നോയിഡ: പണിക്കൂലി നൽകിയതിനെ തുടർന്നുണ്ടായ തർക്കത്തിനൊടുവിൽ യുവാവ് മുതലാളിയുടെ മെഴ്സിഡസ് കാർ പെട്രോൾ ഒഴിച്ച് കത്തിച്ചു. ഉത്തർപ്രദേശിലെ നോയിഡയിൽ കഴിഞ്ഞ ദിവസമാണ് സംഭവം. കാറിന് തീയിട്ട ശേഷം ഓടിരക്ഷപ്പെടുന്ന യുവാവിൻ്റെ ദൃശ്യങ്ങൾ സിസിടിവിയിൽ കുടുങ്ങിയതാണ് ഇയാൾക്ക് വിനയായത്.
മെഴ്സിഡസിൻ്റെ ഉടമയുടെ വീട്ടിൽ യുവാവ് ടൈൽസ് ഇടാൻ എത്തിയിരുന്നു. പണി പൂർത്തിയാക്കിയെങ്കിലും മുഴുവൻ പണം നൽകാൻ വീടിൻ്റെ ഉടമ തയ്യാറായില്ല. ഇതുമായി ബന്ധപ്പെട്ട് നിരവധി തവണ സംസാരിച്ചെങ്കിലും ഫലമുണ്ടായില്ല. തുടർന്ന് ഇയാൾ ആഡംബര കാർ കത്തിക്കുകയായിരുന്നുവെന്നാണ് റിപ്പോർട്ട്.
ബൈക്കിൽ എത്തിയ യുവാവ് റോഡരികിൽ നിർത്തിയിട്ടിരുന്ന കാറിൽ പെട്രോൾ ഒഴിച്ച് തീ കൊളുത്തുകയായിരുന്നു. കാറിൽ തീ പടർന്നതിന് പിന്നാലെ ഇയാൾ ബൈക്കിൽ കയറി രക്ഷപ്പെടുന്നതും സിസിടിവി ദൃശ്യങ്ങളിലുണ്ട്.
കേസെടുത്ത് അന്വേഷണം ആരംഭിച്ച പോലീസ് സിസിടിവി ദൃശ്യങ്ങൾ പരിശോധിച്ച് പ്രതിയെ തിരിച്ചറിയുകയായിരുന്നു. ഇയാളുടെ അറസ്റ്റ് രേഖപ്പെടുത്തിയെന്നും കേസുമായി ബന്ധപ്പെട്ട് വിശദമായ അന്വേഷണം തുടരുകയാണെന്നും പോലീസ് പറഞ്ഞു. ഇയാളുടെ പേരുവിവരങ്ങൾ പുറത്തുവന്നിട്ടില്ല. അറസ്റ്റിലായത് രൺവീർ എന്നയാൾ ആണെന്ന റിപ്പോർട്ട് പുറത്തുവന്നെങ്കിലും സ്ഥിരീകരണം ഉണ്ടായിട്ടില്ല. യുവാവ് മെഴ്സിഡസ് കാർ അഗ്നിക്കിരയാക്കിയ സംഭവത്തെ അനുകൂലിച്ചും പ്രതികൂലിച്ചും സമൂഹമാധ്യമങ്ങളിലടക്കം ചർച്ചകൾ സജീവമാണ്.
मिस्त्री का ‘बदलापुर’
– नोएडा में एक मिस्त्री ने मर्सिडीज कार में आग लगा दी।
– दरअसल मर्सिडीज कार के मालिक ने उससे अपने घर में टाइल्स लगवाए, लेकिन पैसे पूरे नहीं दिए थे।
– जिसके बाद बदला लेने के लिए मिस्त्री ने यह तरीका अपनाया। pic.twitter.com/DCUCCbn8UI
— Shubhankar Mishra (@shubhankrmishra) September 14, 2022
