ജമാഅത്തെ ഇസ്ലാമിയുടെ സ്വാധീനത്തില്‍ വീഴരുത്; ലീഗ്-സമസ്ത ഭിന്നതയില്‍ കാന്തപുരം വിഭാഗം നേതാവ് അബ്ദുല്‍ ഹക്കീം അസ്ഹരി
കോഴിക്കോട്: സമസ്തയും മുസ്ലിം ലീഗും തമ്മിലുള്ള ഭിന്നതയില്‍ നിലപാട് വ്യക്തമാക്കി എ.പി വിഭാഗം നേതാവും എസ്.വൈ.എസ് ജനറല്‍ സെക്രട്ടറിയുമായ എ.പി അബ്ദുല്‍ ഹക്കീം അസ്ഹരി. സമസ്തയുടെ കൂടി ഭാഗമായ ലീഗ് നേതാക്കള്‍ സുന്നി വിരുദ്ധ ആശയങ്ങളെ പിന്തുണക്കുന്നതാണ് ഇപ്പോഴുള്ള അസ്വസ്ഥതകള്‍ക്ക് കാരണമെന്ന് ഹക്കീം അസ്ഹരി പറഞ്ഞു. മുസ്ലിം ലീഗ് രൂപീകരിക്കുന്നതിന് മുമ്പ് സമസ്ത സ്ഥാപിക്കപ്പെട്ടിട്ടുണ്ട്. അതുകൊണ്ടുതന്നെ ലീഗിന് സമസ്തയെ നിയന്ത്രിക്കുന്നതിന് സാംഗത്യമില്ല.
പാണക്കാട് ഖാസി വിവാദത്തിലും ഹക്കീം അസ്ഹരി തന്റെ നിലപാട് വ്യക്തമാക്കി. ഖാസിമാര്‍ പണ്ഡിതന്‍മാര്‍ ആയിരിക്കണമെന്നാണ് മതനിയമമെന്ന് ഹക്കീം അസ്ഹരി പറഞ്ഞു. സാധിക്കലി തങ്ങളുടെ ഖാസി സ്ഥാനത്തിനെതിരെ സമസ്ത നേതാവ് മുക്കം ഉമർ ഫൈസി നടത്തിയ പ്രസ്താവന വിവാദമായ സാഹചര്യത്തിലാണ് ഹക്കീം അസ്ഹരിയുടെ പ്രസ്താവന എന്നത് ശ്രദ്ധേയമാണ്.
.
കേരളത്തില്‍ ഇരു വിഭാഗം സുന്നികളും ഇപ്പോള്‍ നല്ല ബന്ധത്തിലാണ്. തര്‍ക്കങ്ങളൊന്നും എവിടെയുമില്ലെന്നും അസ്ഹരി പറഞ്ഞു. ഒരുമിച്ച് പതാക ഉയര്‍ത്തുന്ന സംഭവങ്ങള്‍ പലയിടത്തും ഉണ്ടായിട്ടുണ്ട്. ഇരു സംഘടനാ നേതാക്കളും ഒരുമിച്ച് വേദി പങ്കിടുകയാണ് ഇനി വേണ്ടത്. എന്നാല്‍ സുന്നി ഐക്യശ്രമം തടയാന്‍ ചില കേന്ദ്രങ്ങളില്‍ നിന്ന് ശ്രമമുണ്ടാകുന്നുണ്ട്. സുന്നികള്‍ ഐക്യപ്പെട്ടാല്‍ അത് തങ്ങള്‍ക്ക് പ്രയാസുണ്ടാകുമോയെന്ന് ചിലര്‍ ഭയപ്പെടുന്നുണ്ടെന്നും അദ്ദേഹം ആരോപിച്ചു. എന്നാൽ സുന്നി ഐക്യത്തിന് തടസമാകുന്ന കേന്ദ്രങ്ങൾ ഏതെന്ന് അദ്ദേഹം വ്യക്തമാക്കിയില്ല.
.
കേരളത്തില്‍ മുസ്ലിം സംഘടനകളെയും വ്യക്തികളെയും സ്വാധീനിക്കാന്‍ ജമാഅത്തെ ഇസ്ലാമി ശ്രമിക്കുന്നുണ്ട്. ജമാഅത്തെ ഇസ്ലാമിക്ക് പിന്നില്‍ രാഷ്ട്രീയമാണ്. അത് കേരളീയ മുസ്ലിം പൊതുസമൂഹം തള്ളിക്കളഞ്ഞതാണ്. അതുകൊണ്ട് തന്നെ മറ്റ് സംഘടനകളെ സ്വാധീനിക്കാന്‍ ഇപ്പോള്‍ ജമാഅത്തെ ഇസ്ലാമി ശ്രമിക്കുന്നുണ്ട്. അതില്‍ വീണുപോകാതിരിക്കാന്‍ ബന്ധപ്പെട്ട നേതാക്കള്‍ ശ്രദ്ധിക്കണമെന്നും ഹക്കീം അസ്ഹരി വ്യക്തമാക്കി.
അതേ സമയം മറ്റു മുസ്ലീം സംഘടനകളെയും വ്യക്തികളേയും സ്വാധീനിക്കാൻ ജമാഅത്തെ ഇസ്ലാമി ശ്രമിച്ചത് എങ്ങിനെയാണെന്ന് അദ്ദേഹം വ്യക്തമാക്കിയില്ല. സിപിഎം നേതാക്കൾ ഇടതടവില്ലാതെ ഓരോ കാര്യങ്ങൾക്കും ജമാഅത്തെ ഇസ്ലാമിയെ കുറ്റപ്പെടുത്തിവരുന്ന സാഹചര്യത്തിലാണ് അബ്ദുൽ ഹഖീം അസ്ഹരിയുടെയും കുറ്റപ്പെടുത്തൽ എന്നത് ശ്രദ്ധേയമാണ്. മലയാളികൾക്കിടയിൽ വ്യാപകമായികൊണ്ടിരിക്കുന്ന മെക് 7 വ്യായാമത്തിന് പിന്നിലും ജമാഅത്തെ ഇസ്ലാമിയാണെന്ന് കാന്തപ്പുരം നേതാവ് പേരോട് അബ്ദുൽ റഹ്മാൻ സഖാഫിയും സിപിഎം നേതാവ് മോഹനൻ മാസ്റ്ററും കുറ്റപ്പെടുത്തിയിരുന്നു. അത്തരം സംഭവങ്ങളാണോ സംഘടനകളേയും വ്യക്തികളേയും സ്വാധീനീക്കാൻ ജമാഅത്തെ ഇസ്ലാമി ശ്രമിക്കുന്നു എന്നത് കൊണ്ട് അദ്ദേഹം ഉദ്ദേശിച്ചതെന്നും വ്യക്തമല്ല.
മുനമ്പത്തെ ഭൂമി വഖഫ് അല്ല എന്ന പ്രതിപക്ഷ നേതാവിന്റെ പ്രസ്താവനയെയും ഹക്കീം അസ്ഹരി തള്ളി. മുനമ്പത്തേത് വഖഫ് ഭൂമിയാണ്. അതില്‍ ബാറും റിസോര്‍ട്ടും എങ്ങിനെ വന്നതെന്നാണ് പരിശോധിക്കേണ്ടത്. മുനമ്പത്തെത് വഖഫ് ഭൂമിയല്ലെന്ന് രേഖകളുണ്ടെന്ന് പറയുന്നവര്‍ അത് കോടതിയില്‍ ഹാജരാക്കണമെന്നും അബ്ദുല്‍ ഹക്കീം അസ്ഹരി പറഞ്ഞു.
.
.
വിവാഹം അന്വേഷിക്കുന്ന യുവതി യുവാക്കൾക്ക് അനുയോജ്യരായ ഇണകളെ കണ്ടെത്താം. പൂർണമായും സൗജന്യ സേവനം. ‘നിക്കാഹ് മാട്രിമോണി’ ഗ്രൂപ്പിൽ അംഗമാകുക.
.
