കോഴിക്കോട്ട് ട്രെയിനിൽ യാത്രക്കാരൻ സഹയാത്രികയെ തീ കൊളുത്തി; എട്ടു പേർക്ക് പൊള്ളലേറ്റു, രണ്ട് പേരുടെ നില ഗുരുതരം

പെണ്‍കുട്ടി ഉള്‍പ്പടെ 8 യാത്രക്കാര്‍ക്ക് പൊള്ളലേറ്റു. കാറ്റില്‍ തീ ആളിപ്പടര്‍ന്നാണ് മറ്റ് യാത്രക്കാര്‍ക്ക് പൊള്ളലേറ്റത്. പരിക്കേറ്റവരില്‍ അഞ്ചുപേരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇതില്‍ ഒരാളുടെ നില ഗുരുതരമാണ്. മറ്റു മൂന്നുപേര്‍ കോഴിക്കോട്ടെ സ്വകാര്യ ആശുപത്രിയിലാണ് ചികിത്സയിലുള്ളത്.

കണ്ണൂര്‍ സ്വദേശി അനില്‍കുമാര്‍ ഭാര്യ സജിഷ, മകന്‍ അദ്വൈത്, തളിപ്പറമ്പ് സ്വദേശി റൂബി, പ്രിന്‍സ്, ജോതിന്ദ്രനാഥ്, പ്രകാശന്‍, അശ്വതി, ആഷിഖ് എന്നിവര്‍ക്കാണ് പൊള്ളലേറ്റതെന്നാണ് പ്രാഥമിക വിവരം.

രണ്ട് കുപ്പി പെട്രോളുമായി വന്ന ഒരാള്‍ പെണ്‍കുട്ടിയും കുടുംബവും ഇരുന്ന സ്ഥലത്ത് എത്തി ഉച്ചത്തില്‍ സംസാരിച്ച് ബഹളം വെക്കുകയും ഒരു കുപ്പി പെട്രോള്‍ ഇവര്‍ക്ക് നേരെ ഒഴിച്ച് തീ കൊളുത്തുകയും ആയിരുന്നെന്ന് പരിക്കേറ്റ ഒരാള്‍ പൊലീസിന് മൊഴി നല്‍കിയിട്ടുണ്ട്. ആക്രമണത്തിന് ശേഷം തീയിട്ട ആള്‍ ചങ്ങല വലിച്ച് ഇറങ്ങിയോടി എന്നും പരിക്കേറ്റയാള്‍ പൊലീസിന് നല്‍കിയ മൊഴിയിലുണ്ട്.

കോഴിക്കോട് റെയിൽവേ സ്റ്റേഷനിൽ നിന്നും രാത്രി 9:07 ന് കണ്ണൂർ ഭാഗത്തേക്ക് പോയ കണ്ണൂർ എക്സിക്യൂട്ടീവ് എക്സ്പ്രസ് ട്രെയിന്‍ എലത്തൂര്‍ കോരപ്പുഴ പാലത്തില്‍ എത്തിയപ്പോഴാണ് നാടിനെ ഞെട്ടിച്ച സംഭവം അരങ്ങേറുന്നത്. സംഭവത്തിന് പിന്നാലെ ട്രെയിന്‍ ചെയിന്‍ വലിച്ച് പാലത്തിന് മുകളില്‍ അടിയന്തരമായി നിര്‍ത്തി. ഇത് കണ്ട നാട്ടുകാരാണ് പൊലീസിനെ വിവരം അറിയിച്ചത്. പൊള്ളലേറ്റവരെ നാട്ടുകാരും പൊലീസും ഫയര്‍ ഫോഴ്സും ചേര്‍ന്നാണ് ആശുപത്രിയിലേക്ക് മാറ്റിയത്.