പിതാവിനെ കാമുകൻ കുത്തിക്കൊല്ലുന്നത് ജനലിലൂടെ നോക്കിനിന്ന് മകൾ; നാടിനെ നടുക്കിയ കൊലപാതകത്തിന് പിന്നിൽ?

വഡോദര: പ്രണയബന്ധത്തെ എതിർത്ത പിതാവിനെ കാമുകനെക്കൊണ്ട് കുത്തിക്കൊല്ലിച്ച് പതിനേഴുകാരി. ഗുജറാത്തിലെ വഡോദരയിലെ പാദ്ര ഗ്രാമത്തിലാണ് സംഭവം. ഉറക്കഗുളിക നൽകി മാതാപിതാക്കളെ മയക്കിയ ശേഷമാണ് മകൾ കാമുകനെ വീട്ടിലേക്ക് വിളിച്ചുവരുത്തിയത്. കൊല്ലപ്പെട്ട ഷാനാ ചൗദയുടെ മകളെയും കാമുകൻ രഞ്ജിത്ത് വഗേലയെയും പൊലിസ് അറസ്റ്റ് ചെയ്തു.

കൊലപാതകം നടന്നത് ഇങ്ങനെ

ഡിസംബർ 18-ന് രാത്രിയാണ് നാടിനെ നടുക്കിയ സംഭവം അരങ്ങേറിയത്. പെൺകുട്ടിയുടെ പ്രണയബന്ധത്തെ എതിർത്തിരുന്ന ഷാനാ ചൗദ, രാത്രിയിൽ ഭാര്യയെയും മകളെയും വീടിനുള്ളിലെ മുറിയിൽ പൂട്ടിയിട്ട ശേഷമാണ് പുറത്ത് ഉറങ്ങാറുള്ളത്. സംഭവദിവസം രാത്രി ഭക്ഷണത്തിൽ ഉറക്കഗുളിക കലർത്തി പെൺകുട്ടി മാതാപിതാക്കൾക്ക് നൽകി. മാതാപിതാക്കൾ മയങ്ങിയതോടെ പെൺകുട്ടി കാമുകൻ രഞ്ജിത്തിനെ വിളിച്ചുവരുത്തുകയായിരുന്നു.

രഞ്ജിത്ത് ഷാനാ ചൗദയെ ക്രൂരമായി കുത്തിക്കൊല്ലുമ്പോൾ, പൂട്ടിയിട്ട മുറിയുടെ ജനൽ വഴി പെൺകുട്ടി ഈ ദൃശ്യങ്ങളെല്ലാം നോക്കിനിന്നു. ഈ സമയം പെൺകുട്ടിയുടെ മാതാവ് തൊട്ടടുത്ത് തന്നെ മയങ്ങിക്കിടക്കുകയായിരുന്നു. രഞ്ജിത്തിനൊപ്പം ഇയാളുടെ സുഹൃത്തായ ഭവ്യ വാസവയും കൃത്യത്തിൽ പങ്കാളിയായെന്ന് പൊലിസ് കണ്ടെത്തി.

മുൻപും മൂന്ന് വധശ്രമങ്ങൾ

പിതാവിനെ വകവരുത്താൻ ഇതിനുമുൻപും മൂന്ന് തവണ പെൺകുട്ടി ശ്രമിച്ചിരുന്നതായി വഡോദര എസ്.പി സുശീൽ അഗർവാൾ വ്യക്തമാക്കി.ആദ്യ രണ്ട് തവണ വെള്ളത്തിൽ ഉറക്കഗുളിക കലർത്തി നൽകിയെങ്കിലും രുചി വ്യത്യാസം തോന്നിയതിനാൽ മാതാവ് അത് കുടിച്ചില്ല.മൂന്നാം തവണ ഭക്ഷണത്തിൽ മരുന്ന് കലർത്തിയെങ്കിലും മാതാപിതാക്കൾ ഉറങ്ങിയോ എന്ന് പരിശോധിക്കാൻ പെൺകുട്ടി ശബ്ദമുണ്ടാക്കിയപ്പോൾ മാതാവ് ഉണർന്നതോടെ ആ ശ്രമവും പരാജയപ്പെട്ടു.

പ്രതിക്കെതിരെ മുൻപ് പോക്സോ കേസ്

കൊല്ലപ്പെട്ട ഷാനാ ചൗദയുടെ മൂത്ത മകളും വീട്ടുകാരുടെ എതിർപ്പ് മറികടന്ന് പ്രണയവിവാഹം കഴിച്ചവളാണ്. രണ്ടാമത്തെ മകളും വഴിതെറ്റുമെന്ന് ഭയന്നാണ് ഷാനാ ഈ ബന്ധത്തെ ശക്തമായി എതിർത്തത്. കഴിഞ്ഞ ജൂലൈയിൽ പെൺകുട്ടി രഞ്ജിത്തിനൊപ്പം ഒളിച്ചോടിയിരുന്നു. അന്ന് ഷാനായുടെ പരാതിയിൽ രഞ്ജിത്തിനെതിരെ പോക്സോ (POCSO) നിയമപ്രകാരം കേസെടുത്ത് ജയിലിലടച്ചിരുന്നു. ജാമ്യത്തിലിറങ്ങിയ രഞ്ജിത്ത് ഇതിന്റെ വൈരാഗ്യത്തിലാണ് കൊലപാതകം ആസൂത്രണം ചെയ്തത്.