ഹമാസ് – ഇസ്രായേൽ സമാധാന കരാർ നാളെ ഒപ്പുവെച്ചേക്കും: ബന്ദി കൈമാറ്റത്തിൽ ഇന്ന് രാത്രിയോടെ ധാരണയാകും, ശുഭപ്രതീക്ഷയിൽ മധ്യസ്ഥ രാജ്യങ്ങൾ

കൈറോ: ഇസ്രായേലും ഫലസ്തീനിലെ ഹമാസും തമ്മിലുള്ള സുപ്രധാനമായ സമാധാന കരാർ നാളെ (ഒക്ടോബർ 9) ഒപ്പുവെച്ചേക്കുമെന്ന് റിപ്പോർട്ടുകൾ. ഈജിപ്തിലെ കൈറോയിൽ കഴിഞ്ഞ മൂന്ന് ദിവസമായി നടന്ന് വരുന്ന തീവ്രമായ മധ്യസ്ഥ ചർച്ചകൾക്ക് ശേഷം ഇന്ന് രാത്രിയോടെ അന്തിമ ധാരണയിൽ എത്താൻ സാധ്യതയുണ്ടെന്നാണ് അന്താരാഷ്ട്ര മാധ്യമങ്ങൾ സൂചിപ്പിക്കുന്നത്. ചർച്ചകളിൽ പങ്കെടുത്ത പേര് വെളിപ്പെടുത്താത്ത രണ്ട് അറബ് വൃത്തങ്ങളെ ഉദ്ധരിച്ചാണ് ഇസ്രായേലി മാധ്യമങ്ങൾ ഈ വിവരം പുറത്തുവിട്ടത്.

കരാർ വേഗത്തിലാക്കാൻ അമേരിക്കയുടെ ശക്തമായ സമ്മർദ്ദമാണ് ഇസ്രായേലിന് മേലുള്ളത്. ഈ വാരാന്ത്യത്തോടുകൂടി ബന്ദി കൈമാറ്റ വിഷയത്തിൽ തീർപ്പുണ്ടാക്കണമെന്ന് യു.എസ്. ഇസ്രായേലിന് നിർദ്ദേശം നൽകിയിരുന്നു. ധാരണയിലെത്തുന്ന പക്ഷം, കരാർ അംഗീകരിക്കുന്നതിനായി ഇസ്രായേൽ മന്ത്രിസഭയിൽ വോട്ടിനിടും. തുടർന്ന്, ഇസ്രായേൽ പാർലമെന്റിന്റെ (നെസറ്റ്) അംഗീകാരം കൂടി ലഭിച്ചാൽ ഉടൻ നടപടികൾ ആരംഭിക്കും. ചർച്ചകൾ ശുഭകരമായി മുന്നോട്ട് പോകുന്നതിനാൽ ഇന്ന് രാത്രിയോടെ അന്തിമ ധാരണ പ്രതീക്ഷിക്കാമെന്ന് മധ്യസ്ഥ രാജ്യങ്ങളിലൊന്നായ തുർക്കിയും വ്യക്തമാക്കി.

റിപ്പോർട്ടുകൾ അനുസരിച്ച്, താൽക്കാലിക വെടിനിർത്തലിന് വഴിയൊരുക്കുന്ന ബന്ദി കൈമാറ്റ ചർച്ചകൾ ഇന്ന് രാത്രിയോടെ പൂർത്തിയാകും. കരാറിലെ വ്യവസ്ഥകൾ ഇങ്ങനെയാണ്:

• ആദ്യഘട്ട കൈമാറ്റം: നിലവിൽ ജീവനോടെയുണ്ടെന്ന് കരുതുന്ന ഏകദേശം 20 ഇസ്രായേലി ബന്ദികളെ ആദ്യഘട്ടത്തിൽ കൈമാറും.
• വെടിനിർത്തൽ: ജീവനുള്ള ബന്ദികളെ കൈമാറിയതിന് തൊട്ടുപിന്നാലെ താൽക്കാലിക വെടിനിർത്തൽ പ്രഖ്യാപിക്കും.
• മൃതദേഹം വീണ്ടെടുക്കൽ: കൊല്ലപ്പെട്ട 28 ബന്ദികളുടെ മൃതദേഹങ്ങൾ വെടിനിർത്തലിന് ശേഷമേ ശേഖരിച്ച് കൈമാറാൻ സാധിക്കൂ എന്ന് ഹമാസ് മധ്യസ്ഥരെ അറിയിച്ചിരുന്നു. വെടിനിർത്തലില്ലാതെ മൃതദേഹങ്ങൾ പുറത്തെത്തിക്കുക സാധ്യമല്ലെന്നും ഹമാസ് നിലപാടെടുത്തു.
• സമയപരിധി: ധാരണ യാഥാർത്ഥ്യമായാൽ, മൂന്ന് ദിവസത്തിനുള്ളിൽ 20 ജീവനുള്ള ബന്ദികളെയും 28 മൃതദേഹങ്ങളെയും കൈമാറണമെന്നാണ് ‘ഇരുപദിന പദ്ധതി’യിലെ വ്യവസ്ഥ. ഇതോടൊപ്പം തടവുകാരുടെ കൈമാറ്റവും ഉറപ്പാക്കണം.

സൈനിക നീക്കങ്ങൾ; മധ്യസ്ഥരുടെ പ്രതീക്ഷ

ഏറ്റവും നിർണായകമായ ചില നീക്കങ്ങൾ ഉടൻ നടക്കാൻ പോകുന്ന സാഹചര്യത്തിൽ, ഇസ്രായേൽ പ്രതിരോധ മന്ത്രി ഗസ്സ സന്ദർശിക്കുകയും അടുത്ത നിർദ്ദേശത്തിനായി ജാഗ്രതയോടെ കാത്തിരിക്കാൻ സൈന്യത്തിന് നിർദ്ദേശം നൽകുകയും ചെയ്തിരുന്നു. ബന്ദി കൈമാറ്റത്തിനുള്ള ഒരുക്കങ്ങൾ പൂർത്തിയാക്കാൻ സൈനിക വിഭാഗത്തോട് ഇസ്രായേൽ നിർദ്ദേശിച്ചതായും റിപ്പോർട്ടുകളുണ്ട്.

മധ്യസ്ഥരായ ഈജിപ്ത്, ഖത്തർ, യു.എസ്. തുടങ്ങിയ രാജ്യങ്ങളുടെ പ്രതിനിധികൾ കൈറോയിൽ തങ്ങി തീവ്ര ശ്രമങ്ങൾ നടത്തിയാണ് ചർച്ചകൾക്ക് ചുക്കാൻ പിടിച്ചത്. മൂന്ന് ദിവസത്തെ ചർച്ചകൾ ശുഭകരമായി സമാപിച്ചു എന്ന പ്രതീക്ഷയിലാണ് മധ്യസ്ഥ ലോകം. ഉടമ്പടി ഒപ്പുവെക്കുകയാണെങ്കിൽ അത് മേഖലയിൽ സമാധാനത്തിൻ്റെ സാധ്യതകൾക്ക് പുത്തൻ പ്രതീക്ഷ നൽകും.