വൻ എംഡിഎംഎ വേട്ട; 765 ഗ്രാമുമായി മൂന്ന് യുവാക്കൾ പിടിയിൽ
കണ്ണൂർ കാൾടെക്സിൽ പൊലീസ് നടത്തിയ മിന്നൽ പരിശോധനയിൽ വൻ ലഹരിമരുന്ന് ശേഖരം പിടികൂടി. വിപണിയിൽ ലക്ഷങ്ങൾ വിലമതിക്കുന്ന 765 ഗ്രാം എംഡിഎംഎയുമായാണ് മൂന്ന് യുവാക്കൾ പിടിയിലായത്. കണ്ണൂർ സിറ്റി സ്വദേശികളായ റംഷീദ് കെ.വി (26), റിഷാദ് കെ.വി (28), ചെമ്പിലോട് കോയോട് സ്വദേശി ഇർഫാൻ കെ (23) എന്നിവരെയാണ് ടൗൺ പൊലീസ് അറസ്റ്റ് ചെയ്തത്.
കാറിൽ ലഹരിമരുന്ന് കടത്തുന്നുണ്ടെന്ന രഹസ്യ വിവരം സിറ്റി പൊലീസ് കമ്മീഷണർക്ക് ലഭിച്ചതിനെത്തുടർന്നാണ് പരിശോധന നടന്നത്. കമ്മീഷണറുടെ പ്രത്യേക നിർദ്ദേശപ്രകാരം പൊലീസ് സംഘം കാൾടെക്സിൽ വെച്ച് പ്രതികൾ സഞ്ചരിച്ച കാർ തടഞ്ഞുനിർത്തി പരിശോധിക്കുകയായിരുന്നു. കാറിനുള്ളിൽ ഒളിപ്പിച്ച നിലയിലാണ് ലഹരിമരുന്ന് കണ്ടെത്തിയത്.
പിടികൂടിയ എംഡിഎംഎയുടെ വലിയ അളവ് കണക്കിലെടുക്കുമ്പോൾ ഇതിന് പിന്നിൽ വലിയ ലഹരി മാഫിയ സംഘമുണ്ടെന്നാണ് പൊലീസിന്റെ പ്രാഥമിക നിഗമനം. പ്രതികൾക്ക് ഈ ലഹരിമരുന്ന് എവിടെ നിന്നാണ് ലഭിച്ചതെന്നും ആർക്ക് കൈമാറാനാണ് എത്തിച്ചതെന്നും പൊലീസ് അന്വേഷിച്ചുവരികയാണ്.
