കോടതി വ്യവഹാരങ്ങള്ക്ക് പരിഹാരം ഉണ്ടാകുമെന്ന് വിശ്വാസം; കോവിലില് വഴിപാട് നടത്തി രാഹുല് മാങ്കൂട്ടത്തില്
കോട്ടയം: ചെറുവള്ളി ദേവീക്ഷേത്രത്തിലെ ജഡ്ജിയമ്മാവൻ കോവിലിൽ ദർശനം നടത്തി വഴിപാട് നടത്തി രാഹുൽ മാങ്കൂട്ടത്തിൽ. കേസുകളിലും കോടതി വ്യവഹരങ്ങളിലും പെടുന്നവർ രക്ഷ തേടി പ്രാർഥിക്കാൻ എത്താറുള്ള ക്ഷേത്രമാണ് ഇത്. മുൻപ് നടൻ ദിലീപടക്കം ഈ ക്ഷേത്രത്തിലെത്തി വഴിപാട് നടത്തിയിരുന്നു.
പ്രാദേശിക തിരഞ്ഞെടുപ്പ് വിശകലനം
ഇന്ന് വൈകീട്ടാണ് രാഹുൽ ക്ഷേത്രത്തിൽ എത്തിയത്. ജുഡീഷ്യറി കാര്യങ്ങൾക്കായി പ്രാർഥിക്കുന്ന ‘ജഡ്ജി അമ്മാവൻ’ എന്ന ഉപദേവതയും ചെറുവള്ളി ദേവീ ക്ഷേത്രത്തിൽ പ്രതിഷ്ഠ ഉണ്ടെന്നാണ് വിശ്വാസം. വാദിയാണെങ്കിലും പ്രതിയാണെങ്കിലും, ജഡ്ജി അമ്മാവൻ നീതിയുടെ ഭാഗത്തു നില്ക്കുമെന്ന് വിശ്വസിക്കപ്പെടുന്നു. കേരളത്തിന്റെ വിവിധ ഭാഗങ്ങളില് നിന്നും നിരവധി സഞ്ചാരികൾ ഈ ക്ഷേത്രത്തിലെത്താറുണ്ട്. ഇവിടെ എത്തി പ്രാര്ഥിച്ചാല് കോടതിയിൽ നിന്നും അനുകൂല വിധി ഉണ്ടാകുമെന്നാണ് വിശ്വാസം.
നടിയെ ആക്രമിച്ച കേസിൽ പ്രതിയായിരിക്കെ നടൻ ദിലീപ് ഇവിടെ എത്തി വഴിപാട് നടത്തിയിരുന്നു. ദിലീപ് കുറ്റവിമുക്തനായതിന് പിന്നാലെ രാഹുൽ മാങ്കൂട്ടത്തിൽ എത്തിയത് എന്നതാണ് ശ്രദ്ധേയം. കേസുകളിൽ വിജയം നേടാൻ, തടസ്സങ്ങൾ മാറാൻ, ഉപകാര സ്മരണ എന്നിവയ്ക്കാണ് ജഡ്ജി അമ്മാവൻ കോവിലിൽ വഴിപാട് നടത്തുന്നത്. മുൻ മന്ത്രി ബാലകൃഷ്ണ പിള്ള, ക്രിക്കറ്റർ ശ്രീശാന്ത് അടക്കം ഇവിടെ എത്തിയിട്ടുണ്ട്.
