‘16 മണിക്കൂറിനുള്ളിൽ’ രണ്ട് വയസ്സുകാരിയുടെ ജീവനെടുത്തത് ഗുരുതര പിഴവ്

ലണ്ടൻ: രണ്ട് വയസ്സുകാരി ലൈല സ്റ്റോറിയുടെ മരണകാരണം രോഗനിർണയത്തിലെ പാളിച്ചയാണെന്ന് ആരോപിച്ച് മാതാപിതാക്കളായ എമ്മയും ജോണും രംഗത്ത്. രണ്ടാം ജന്മദിനം ആഘോഷിച്ച് ദിവസങ്ങൾക്കുള്ളിലാണ് ലൈലയ്ക്ക് ആരോഗ്യപ്രശ്നങ്ങൾ അനുഭവപ്പെട്ടത്.

ചെറിയ ക്ഷീണവും വിശപ്പില്ലായ്മയുമാണ് ആദ്യഘട്ടത്തിൽ കുട്ടി പ്രകടിപ്പിച്ച ലക്ഷണങ്ങൾ. മേയ് മാസത്തിന്റെ തുടക്കത്തിലായിരുന്നു കുട്ടി രോഗലക്ഷണങ്ങൾ പ്രകടിപ്പിച്ച് തുടങ്ങിയത്. പിന്നീട് ദാഹം കൂടി, മുഖം മെലിഞ്ഞ് ഭാരം കുറഞ്ഞു. ഇതോടെ കുട്ടിയെ ജനറൽ പ്രാക്ടീഷണറുടെ (ജി.പി.) അടുത്ത് കൊണ്ടുപോയി.

ഡോക്ടർ കുട്ടിക്ക് ടോൺസിലൈറ്റിസ് ആണെന്ന് നിർണയിച്ച് ആന്റിബയോട്ടിക്കുകൾ നൽകി. 24 മണിക്കൂറിനുള്ളിൽ നില മെച്ചപ്പെടുന്നില്ലെങ്കിൽ എമർജൻസി വിഭാഗത്തിലേക്ക് കൊണ്ടുപോകാനും നിർദ്ദേശിച്ചു. പക്ഷേ, ഡോക്ടറെ കണ്ട് 16 മണിക്കൂർ പൂർത്തിയാകുന്നതിന് മുൻപ് ലൈല മരണത്തിന് കീഴടങ്ങി.

ലൈലയെ കിടക്കയിൽ ഉറക്കി, അതിരാവിലെ പരിശോധിക്കാൻ ചെന്നപ്പോഴേക്കും ലൈലയുടെ ശരീരം തണുത്തുറഞ്ഞ നിലയിലായിരുന്നെന്ന് ജോൺ ഓർക്കുന്നു. മോൾ പോയെന്ന് എനിക്ക് മനസ്സിലായി എന്നും കണ്ണീരോടെ അദ്ദേഹം കൂട്ടിച്ചേർത്തു.

പോസ്റ്റ്മോർട്ടം രക്തപരിശോധനയിൽ ലൈലയ്ക്ക് രക്തത്തിൽ ഉയർന്ന പഞ്ചസാരയുടെ അളവ് (HbA1c 89mmol/mol) ഉണ്ടായിരുന്നതായി കണ്ടെത്തി. കൂടാതെ, പ്രമേഹത്തിന്റെ പെട്ടെന്നുള്ളതും ജീവന് ഭീഷണിയുയർത്തുന്നതുമായ സങ്കീർണതയായ ഡയബറ്റിക് കീറ്റോഅസിഡോസിസ് (DKA) ലൈലയിൽ വികസിച്ചിരുന്നു.

ശരീരത്തിൽ ഇൻസുലിൻ ഇല്ലാത്തതിനാൽ പഞ്ചസാര രക്തത്തിൽ അടിഞ്ഞുകൂടുകയും, ശരീരം ഊർജ്ജത്തിനായി കൊഴുപ്പ് അതിവേഗം കത്തിക്കുകയും ചെയ്യുമ്പോൾ വിഷാംശമുള്ള കീറ്റോണുകൾ രക്തത്തിൽ കലർന്ന് ശരീരത്തെ വിഷമയമാക്കുന്ന അവസ്ഥയാണിത്.

ഛർദ്ദി, ദാഹം, ക്ഷീണം, ഭാരം കുറയൽ തുടങ്ങിയ ലക്ഷണങ്ങളാണ് മാതാപിതാക്കൾ ഡോക്ടറെ അറിയിച്ചത്. എന്നാൽ ഇവയെല്ലാം ടൈപ്പ് 1 പ്രമേഹത്തിന്റെ ലക്ഷണങ്ങളാണെന്ന് നിർണയിക്കുന്നതിൽ ഡോക്ടർ പരാജയപ്പെട്ടു.

ചെറിയ കുട്ടികളിൽ ഇൻസുലിൻ ഉൽപാദനം അതിവേഗം നിലയ്ക്കുന്നതിനാൽ രോഗാവസ്ഥ വളരെ വേഗത്തിൽ വഷളായേക്കാം. എക്സെറ്റർ സർവകലാശാലയുടെ പഠനം അനുസരിച്ച് ഏഴ് വയസ്സിന് താഴെയുള്ള കുട്ടികളിൽ ഇൻസുലിൻ ഉൽപാദിപ്പിക്കുന്ന കോശങ്ങൾ പൂർണ്ണമായും ഇല്ലാതാകാൻ സാധ്യതയുണ്ട്. ഈ ലക്ഷണങ്ങളുള്ള (4 T-കൾ – Toilet, Thirst, Tired, Thinner) ഏത് കുട്ടിക്കും ഗ്ലൂക്കോസ് അളവ് പരിശോധിക്കാൻ ഒരു രക്തപരിശോധന നടത്തുകയോ അല്ലെങ്കിൽ പീഡിയാട്രിക് യൂണിറ്റിലേക്ക് റഫർ ചെയ്യുകയോ ചെയ്യേണ്ടതാണ്.

എന്നാൽ പലപ്പോഴും ഈ ലക്ഷണങ്ങൾ സാധാരണ വയറുവേദനയോ പനിയോ ആയി തെറ്റിധരിക്കപ്പെടാമെന്നത് ഒരു വെല്ലുവിളിയാണ്. എങ്കിലും, ‘ചെറിയ കുട്ടികൾക്ക് അവരുടെ അവസ്ഥയുടെ തീവ്രത വ്യക്തമാക്കാൻ കഴിയാത്തതിനാൽ മുതിർന്നവർക്ക് മാത്രമേ അപകടം തിരിച്ചറിയാൻ കഴിയൂ’ എന്ന് ഡോ. ക്രിസ് കൂപ്പർ പറയുന്നു.

മകളുടെ മരണശേഷം ജോൺ ഫേസ്ബുക്കിൽ അനുഭവം പങ്കുവെച്ചപ്പോൾ തങ്ങളുടെ കുട്ടികൾക്ക് സമാനമായ രോഗനിർണയം വൈകിയ അനുഭവങ്ങളുള്ള നൂറുകണക്കിന് മാതാപിതാക്കളാണ് പ്രതികരിച്ചത്. ഇത് കണ്ടതോടെ ‘ലൈലാസ് ലോ’ (Lyla’s Law) എന്ന പേരിൽ ഒരു നിയമത്തിനായി ദമ്പതികൾ ഇപ്പോൾ പ്രചാരണം നടത്തുകയാണ്. 

ലക്ഷണങ്ങളുള്ള കുട്ടികൾക്ക് പ്രമേഹ നിർണയ പരിശോധനകൾ (മൂത്രം/അല്ലെങ്കിൽ രക്തപരിശോധന) ഉറപ്പാക്കണമെന്നും ഇത് പാലിക്കാത്ത ജി.പി.മാർക്ക് ബോധവൽക്കരണ കോഴ്സുകൾ നിർബന്ധമാക്കണമെന്നുമാണ് ഇവരുടെ ആവശ്യം. ടൈപ്പ് 1 പ്രമേഹത്തിന്റെ രോഗനിർണയം വൈകുന്നത് കാരണം ഇനി ഒരു കുട്ടിയെയും നഷ്ടപ്പെടാതിരിക്കാൻ സംവിധാനം കുറ്റമറ്റതായിരിക്കണം എന്ന് ജോൺ കൂട്ടിച്ചേർത്തു.