ഫിലഡൽഫിയ വിമാനത്താവളത്തിൽ ബോംബ് ഭീഷണി: വിമാന സർവീസുകൾ അടിയന്തരമായി നിർത്തിവച്ചു

വാഷിങ്ടൻ: അമേരിക്കയിലെ ഫിലഡൽഫിയ രാജ്യാന്തര വിമാനത്താവളത്തിൽ ഉണ്ടായ ബോംബ് ഭീഷണിയെത്തുടർന്ന് വിമാന സർവീസുകൾ അടിയന്തരമായി നിർത്തിവച്ചു. വെള്ളിയാഴ്ച വൈകുന്നേരമാണ് സംഭവം. ഭീഷണിയുടെ പശ്ചാത്തലത്തിൽ യുഎസ് ഫെഡറൽ ഏവിയേഷൻ അഡ്മിനിസ്ട്രേഷൻ വിമാനത്താവളത്തിൽ നിന്നുള്ള എല്ലാ സർവീസുകൾക്കും താത്കാലിക വിലക്കേർപ്പെടുത്തി.

സുരക്ഷാ ഭീഷണിയെത്തുടർന്ന് പ്രാദേശിക സമയം വൈകുന്നേരം 7 മണിയോടെയാണ് എഫ്എഎ വിമാനത്താവളത്തിൽ ‘ഗ്രൗണ്ട് സ്റ്റോപ്പ്’ (Ground Stop) പ്രഖ്യാപിച്ചത്. ഇതോടെ പുറപ്പെടാനിരുന്ന എല്ലാ വിമാനങ്ങളും റദ്ദാക്കുകയും യാത്രക്കാരെ സുരക്ഷിത സ്ഥാനങ്ങളിലേക്ക് മാറ്റുകയും ചെയ്തു. ഒരു വിമാനത്തിനുള്ളിൽ സുരക്ഷാ പ്രശ്നമുണ്ടെന്ന വിവരത്തെത്തുടർന്ന് ഫിലാഡൽഫിയ പൊലീസ് ഉദ്യോഗസ്ഥർ വിമാനത്താവളത്തിൽ അടിയന്തര പരിശോധന നടത്തി.

ഏകദേശം 30 മിനിറ്റോളം നീണ്ടുനിന്ന അനിശ്ചിതത്വത്തിനൊടുവിൽ ഭീഷണി വ്യാജമാണെന്ന് സ്ഥിരീകരിച്ചു. സുരക്ഷാ ഉദ്യോഗസ്ഥരുടെ വിശദമായ പരിശോധനയ്ക്ക് ശേഷം വിമാനത്താവളത്തിന്റെ പ്രവർത്തനം സാധാരണ നിലയിലായതായി അധികൃതർ അറിയിച്ചു.

കഴിഞ്ഞ കുറച്ചു ദിവസങ്ങളായി അമേരിക്കയിലെ വിവിധ വിമാനത്താവളങ്ങളിൽ സമാനമായ രീതിയിലുള്ള വ്യാജ ബോംബ് ഭീഷണികൾ റിപ്പോർട്ട് ചെയ്യപ്പെടുന്നുണ്ട്. വാഷിങ്ടനിലെ റീഗൻ നാഷനൽ എയർപോർട്ടിലും ന്യൂയോർക്കിലെ ലാഗ്വാർഡിയ എയർപോർട്ടിലും കഴിഞ്ഞാഴ്ച സമാനമായ സംഭവങ്ങൾ റിപ്പോർട്ട് ചെയ്തിരുന്നു. യാത്രക്കാരുടെ സുരക്ഷയ്ക്ക് മുൻഗണന നൽകുന്നതിനാലാണ് ചെറിയ ഭീഷണികൾ പോലും ഗൗരവമായി കാണുന്നതെന്ന് അധികൃതർ വ്യക്തമാക്കി.