സൗദിയിൽ ടൂറിസ്റ്റ് മാർഗനിർദേശങ്ങൾ ലംഘിച്ചാൽ കാൽ ലക്ഷം റിയാൽ വരെ പിഴ ചുമത്തും

റിയാദ്: സൗദി അറേബ്യയിൽ ടൂറിസ്റ്റ് മാർഗനിർദ്ദേശ ചട്ടങ്ങൾ ലംഘിക്കുന്ന ടൂർ ഗൈഡുകൾക്ക് 25,000 റിയാൽ വരെ പിഴ ചുമത്താൻ ടൂറിസം മന്ത്രാലയം തീരുമാനിച്ചു. പിഴ ഷെഡ്യൂളിലെ ഭേദഗതികൾക്ക് മന്ത്രാലയം അംഗീകാരം നൽകി. ടൂർ ഗൈഡിംഗുമായി ബന്ധപ്പെട്ട ഗുരുതരമായ നിയമലംഘനങ്ങൾക്കാണ് ഉയർന്ന പിഴ ചുമത്തുക.

പ്രധാന ലംഘനങ്ങൾ:

• ലൈസൻസ് ഇല്ലാതെ ഗൈഡിംഗ്: പുതിയ ഭേദഗതി അനുസരിച്ച്, സാധുവായ ലൈസൻസില്ലാതെ ടൂർ ഗൈഡ് പ്രവർത്തനം നടത്തുന്നത് ഏറ്റവും പ്രധാനപ്പെട്ട ലംഘനമാണ്. ലൈസൻസ് കാലഹരണപ്പെട്ട ശേഷമോ റദ്ദാക്കിയതിനുശേഷമോ സസ്പെൻഷൻ കാലയളവിലോ പ്രവർത്തനം തുടരുന്നതും ഇതിൽ ഉൾപ്പെടും.
• തെറ്റിദ്ധരിപ്പിക്കുന്ന വിവരങ്ങൾ: രാജ്യത്തിന്റെ പ്രശസ്തിക്കോ ടൂറിസം താൽപ്പര്യങ്ങൾക്കോ ദോഷകരമാകുന്ന തരത്തിൽ ടൂറിസ്റ്റുകൾക്ക് തെറ്റിദ്ധരിപ്പിക്കുന്ന വിവരങ്ങൾ നൽകുന്നതും ഗുരുതര ലംഘനമായി കണക്കാക്കും.
• ലൈസൻസ് ദുരുപയോഗം: ലൈസൻസ് മൂന്നാം കക്ഷികൾക്ക് ഉപയോഗിക്കാൻ നൽകുന്നതും ഈ വിഭാഗത്തിൽപ്പെടും.

.

ചെറിയ ലംഘനങ്ങൾക്ക് പിഴ:

ലൈസൻസ് ഇല്ലാതിരിക്കുക, പ്രവർത്തനം താൽക്കാലികമായി നിർത്തിവയ്ക്കുന്നതിനോ റദ്ദാക്കുന്നതിനോ മുൻകൂട്ടി മന്ത്രാലയത്തെ അറിയിക്കാതിരിക്കുക തുടങ്ങിയ ചെറിയ ലംഘനങ്ങൾക്ക് 500 മുതൽ 2,000 റിയാൽ വരെയാണ് പിഴ. ബന്ധപ്പെട്ട അധികാരികളുടെ അംഗീകാരമില്ലാതെയോ പരിധിക്ക് പുറത്തോ സേവനങ്ങൾ നൽകുന്ന ഗൈഡുകൾക്കും വിവരങ്ങൾ അപ്ഡേറ്റ് ചെയ്യാത്തവർക്കും യാത്രയുടെ സ്വഭാവത്തിന് യോജിക്കാത്ത വസ്ത്രം ധരിക്കുന്നവർക്കും ഈ പിഴ ബാധകമാണ്.

നിയന്ത്രിത മേഖലകളിൽ കർശന നിയന്ത്രണം:

സൈനിക, അതിർത്തി, കസ്റ്റംസ് മേഖലകൾ സന്ദർശിക്കുമ്പോൾ ബന്ധപ്പെട്ട അധികൃതരുടെ മുൻകൂർ അനുമതിയില്ലാതെ ടൂർ ഗൈഡ് സേവനങ്ങൾ നൽകുന്നതിനും അവിടെ ഫോട്ടോ എടുക്കുന്നതിനും കർശന നിയന്ത്രണമുണ്ട്. ഈ ലംഘനങ്ങൾക്ക് 5,000 മുതൽ 15,000 റിയാൽ വരെയാണ് പിഴ.

പിഴ ചുമത്തുന്ന രീതി:

• ലംഘനം കണ്ടെത്തിയാൽ 10,000 റിയാലിൽ കൂടാത്ത അടിയന്തര പിഴ ചുമത്താൻ ടൂറിസം ഇൻസ്‌പെക്ടർമാർക്ക് അധികാരമുണ്ട്. മറ്റ് പിഴകൾ ചുമത്തുന്നത് ലംഘന അവലോകന സമിതിയായിരിക്കും.
• ചെറിയ ലംഘനങ്ങൾക്ക് ആദ്യ ഘട്ടത്തിൽ മുന്നറിയിപ്പും തിരുത്താനുള്ള സമയവും നൽകും. ആവർത്തിച്ചാൽ മുന്നറിയിപ്പ് ഉണ്ടാകില്ല.
• ഒരു വർഷത്തിനുള്ളിൽ ലംഘനം ആവർത്തിച്ചാൽ പിഴ ഇരട്ടിയാക്കുകയും ലൈസൻസ് സസ്പെൻഷൻ കാലയളവ് ഒരു വർഷം വരെ വർദ്ധിപ്പിക്കുകയും ചെയ്യും.
• സാമ്പത്തികമല്ലാത്ത മൂന്ന് ലംഘനങ്ങൾ ഉണ്ടായാൽ ലൈസൻസ് 60 ദിവസത്തേക്ക് സസ്പെൻഡ് ചെയ്യും. നാലാമത്തെ ലംഘനത്തിന് ലൈസൻസ് ശാശ്വതമായി റദ്ദാക്കും.
• നിയമം ലംഘനം തുടരുന്ന ഓരോ ദിവസത്തിനും അധിക പിഴ ചുമത്താൻ സമിതിക്ക് അധികാരമുണ്ട്.

പുതിയ നിയമപ്രകാരം കുറഞ്ഞ പിഴയിലാണ് ശിക്ഷകൾ ആരംഭിക്കുകയെങ്കിലും, ആവർത്തിച്ചുള്ള ലംഘനങ്ങൾക്ക് പിഴ ക്രമേണ വർദ്ധിപ്പിക്കുകയും പരമാവധി പിഴ യഥാർഥ പിഴയുടെ അഞ്ചിരട്ടിയോ പത്ത് ലക്ഷം റിയാലോ കവിയാതിരിക്കുകയും ചെയ്യും. ലംഘനത്തിന്റെ സ്വഭാവവും ഗൗരവവും അനുസരിച്ച് സാമ്പത്തിക പിഴയോടൊപ്പം ലൈസൻസ് സസ്പെൻഷൻ പോലുള്ള നടപടികളും സ്വീകരിക്കും.