സൗദിയിൽ നിയമവിരുദ്ധ ഉൽപ്പന്നങ്ങൾക്കെതിരെ കർശന നടപടി; 36 ലക്ഷം ഉൽപ്പന്നങ്ങൾ പിടിച്ചെടുത്തു
റിയാദ്: സൗദി അറേബ്യയിൽ വ്യാപാര കച്ചവട നിയമങ്ങൾ ലംഘിക്കുന്നവർക്കെതിരെ സൗദി അതോറിറ്റി ഫോർ ഇന്റലക്ച്വൽ പ്രോപ്പർട്ടി (SAIP) കർശന നടപടി തുടരുന്നു. അതോറിറ്റി പുറത്തിറക്കിയ 2024-ലെ വാർഷിക റിപ്പോർട്ട് അനുസരിച്ച്, രാജ്യത്തെ 51 നഗരങ്ങളിലും ഗവർണറേറ്റുകളിലുമായി നടത്തിയ പരിശോധനകളിൽ 36 ലക്ഷത്തിലധികം നിയമവിരുദ്ധ ഉൽപ്പന്നങ്ങൾ പിടിച്ചെടുത്തു. പിടിച്ചെടുത്ത ഉൽപ്പന്നങ്ങളിൽ 52 ശതമാനവും വസ്ത്ര, പാദരക്ഷാ മേഖലകളിലുള്ളവയാണ്.
സകാത്ത്, നികുതി, കസ്റ്റംസ് അതോറിറ്റി എന്നിവയുമായി സഹകരിച്ച് നടത്തിയ പരിശോധനകളിലും കർശനമായ നിയന്ത്രണങ്ങളിലും, 67 ലക്ഷത്തിലധികം നിയമലംഘന ഉൽപ്പന്നങ്ങൾ പ്രാദേശിക വിപണിയിലേക്ക് എത്തുന്നത് തടയാനും സാധിച്ചു. കള്ളക്കടത്ത്, അനധികൃത വ്യാപാരം എന്നിവ തടയുന്നതിൽ ഈ ഏജൻസികളുടെ ഏകോപനം വലിയ പങ്കുവഹിച്ചു.
ഡിജിറ്റൽ മേഖലയിലും നടപടി ശക്തം
ഡിജിറ്റൽ പ്ലാറ്റ്ഫോമുകളിലും SAIP നിയമലംഘകർക്കെതിരെ ശക്തമായ നടപടികളാണ് സ്വീകരിച്ചത്. 2024-ൽ ഏകദേശം 7,900-ൽ അധികം വെബ്സൈറ്റുകൾ ബ്ലോക്ക് ചെയ്തു. പകർപ്പവകാശ നിയമം ലംഘിച്ച് ലൈവ് സ്ട്രീമിംഗ് നടത്തിയ വെബ്സൈറ്റുകളുടെ എണ്ണത്തിൽ 2023-നെ അപേക്ഷിച്ച് 128 ശതമാനം വർധനവുണ്ടായി. ഇത് ഓൺലൈൻ പൈറസി തടയുന്നതിൽ അതോറിറ്റി എത്രത്തോളം ശ്രദ്ധിക്കുന്നു എന്നതിൻ്റെ സൂചനയാണ്. കൂടാതെ, പകർപ്പവകാശ, വ്യാപാരമുദ്ര ലംഘനങ്ങളുമായി ബന്ധപ്പെട്ട് ലഭിച്ച 3,200-ൽ അധികം പരാതികളും അതോറിറ്റി പരിശോധിച്ച് നടപടിയെടുത്തു.
