രാഹുല് മാങ്കൂട്ടത്തിലിന്റെ ഓഫീസിനുമുന്നില് എസ്എഫ്ഐ പ്രതിഷേധം; ജലപീരങ്കി പ്രയോഗിച്ച് പോലീസ്
പാലക്കാട്: രാഹുല് മാങ്കൂട്ടത്തില് എംഎല്എയുടെ ഓഫീസിലേക്ക് എസ്എഫ്ഐ നടത്തിയ പ്രതിഷേധ മാര്ച്ചില് സംഘര്ഷം. ഇരുന്നൂറോളം വരുന്ന എസ്എഫ്ഐ പ്രവര്ത്തകരാണ് വെള്ളിയാഴ്ച എംഎല്എ ഓഫീസിലേക്ക് മാര്ച്ച് നടത്തിയത്. രാഹുല് മോശമായി പെരുമാറിയെന്ന് സ്ത്രീകള് പരാതികള് ഉന്നയിച്ച സാഹചര്യത്തില് എംഎല്എ സ്ഥാനം രാജിവെയ്ക്കണമെന്നാവശ്യപ്പെട്ടായിരുന്നു പ്രതിഷേധം.
പാലക്കാട് കോട്ടമൈതാനത്തുനിന്ന് ആരംഭിച്ച മാര്ച്ച് രാഹുല് മാങ്കൂട്ടത്തില് എംഎല്എയുടെ ഓഫീസിലേക്കുള്ള വഴിയില്വെച്ച് ആദ്യം ബാരിക്കേഡ് വെച്ച് പോലീസ് തടഞ്ഞു. പ്രവര്ത്തകര് ബാരിക്കേഡ് മറിച്ചിടാനും മറികടക്കാനും ശ്രമിച്ചതോടെ പോലീസ് ജലപീരങ്കി പ്രയോഗിച്ചു. എന്നാല്, ഇത് വകവെയ്ക്കാതെ പ്രവര്ത്തകര് ബാരിക്കേഡ് മറികടന്ന് എംഎല്എയുടെ ഓഫീസിനുമുന്നില് കുത്തിയിരുന്ന് പ്രതിഷേധിച്ചു.
