‘അച്ചാർ, പലഹാരം, മരുന്ന്…’, ഗൾഫിലേക്ക് വരുന്ന മലയാലി ചെറുപ്പക്കാർ ലഹരി കേസുകളിൽ കുടുങ്ങുന്നത് പതിവാകുന്നു; വിമാനത്താവളങ്ങളിൽ പരിശോധന ശക്തമാക്കി
ദുബൈ: ഗൾഫ് രാജ്യങ്ങളിൽ ലഹരി മരുന്നിൻ്റെ വ്യാപനം ശക്തമായതോടെ വിമാനത്താവളങ്ങളിലുൾപ്പെടെ പരിശോധന ശക്തമാക്കി. എല്ലാ ഗൾഫ് രാജ്യങ്ങളിലും പരിശോധന ശക്തമാക്കിയിട്ടുണ്ട്. ജിസിസി രാജ്യങ്ങൾക്കിടയിൽ ഇതിനായി പ്രത്യേക ഏകോപനം തന്നെ നടപ്പിലാക്കിയിട്ടുണ്ട്.
.
വിവിധ രാജ്യങ്ങളിൽ നിന്നും ഗൾഫിലേക്ക് വരുന്ന പ്രവാസികളേയും ഹജ്ജ് ഉംറ തീർഥാകരേയും കൃത്യമായി പരിശോധിച്ച ശേഷം മാത്രമേ വിമാനത്താവളങ്ങളിൽ നിന്ന് പുറത്തിറങ്ങാൻ അനുവദിക്കൂ. അത്യാധുനിക ഉപകരണങ്ങളുടെ സഹായത്തോടെ വളരെ വേഗത്തിൽ ലഗേജുകളും ഹാൻഡ് ബാഗുകളും പരിശോധിക്കാനുള്ള സംവിധാനങ്ങൾ എല്ലാ വിമാനത്താവളങ്ങളിലും ഒരുക്കിയിട്ടുണ്ട്. ആർട്ടിഫിഷ്യൽ ഇൻ്റലിജൻസിൻ്റെ സഹായത്തോടെയാണ് പരിശോധന. ലഗേജുകൾ മാത്രമല്ല, വിമാനത്താവളത്തിലെത്തുന്ന യാത്രക്കാരുടെ നീക്കങ്ങളും മുഖഭാവവും ശരീരഭാഷയും പോലും എഐ സാങ്കേതിക വിദ്യയുടെ സഹായത്തോെടെ രഹസ്യമായി നിരീക്ഷിക്കുന്നുണ്ട്.
.
മയക്കുമരുന്ന് കേസുകൾ വലിയ വിപത്താണ്. നാട്ടിലായാലും മറുനാട്ടിലായാലും. ഗൾഫ് നാടുകളിലെത്തുന്ന മലയാളി ചെറുപ്പക്കാരും അറിഞ്ഞോ അറിയാതെയോ ലഹരിയുടെ വലകളിൽ പെട്ടു പോകുന്നുണ്ട്. അതിഗുരുതരമായ പ്രത്യാഘാതമാണ് കാത്തിരിക്കുന്നതെന്നറിയാതെയാണ് പലരും ഇതിൽപ്പെടുന്നത്. അതും ചെറുപ്പക്കാർ.
.
കൂട്ടുകാരൻ പലഹാരമെന്നു പറഞ്ഞു തന്നയച്ചത്, നാട്ടിൽ നിന്ന് വരുമ്പോൾ മറ്റൊരാളെ സഹായിക്കാൻ വേണ്ടി വാങ്ങിവെച്ചത്, സുഹൃത്തിന് കൊടുക്കാൻ അവൻ്റെ വീട്ടുകാർ തന്ന് വിട്ട അച്ചാർ, മരുന്ന്, എന്നിങ്ങനെ പല രീതിയിലാണ് ആളുകൾ ഇവിടെ ലഹരിമരുന്ന് കേസുകളില്‍ കുടുങ്ങുന്നത്. കൊടും ചതിയുടെ കഥമാത്രമേ പെടുന്നവർക്ക് പറയാനുള്ളൂ. പറഞ്ഞത് തെളിയിക്കാനായില്ലെങ്കിൽ വെറും വാക്കുകളോ ഒഴിവ് കഴിവുകളോ ഗൾഫ് നാടുകളിലെ നിയമസംവിധാനങ്ങൾക്ക് മുന്നിൽ വിലപ്പോവില്ല. അത്രയും ശക്തവും പഴുതടച്ചതുമാണ് നടപടികൾ. അതേസമയം അപൂർവ്വം കേസുകൾ മറ്റുള്ളവരുടെ ചതിയിൽ പെടുന്നവരുമുണ്ട്.
.
നിയമസഹായം നൽകുന്നവർക്ക് മുന്നിലും പൊതുപ്രവർത്തകർക്ക് മുന്നിലും ചെറുപ്പക്കാർ ചെന്നുപെടുന്ന മയക്കുമരുന്ന് കേസുകൾ കൂടുന്നുവെന്നാണ് അനുഭവം. അപ്രതീക്ഷിതമായി പരിശോധനകളിൽ പിടിക്കപ്പെടുന്നവരുമുണ്ട്. ഉപയോഗത്തിന് മാത്രമായി പിടിക്കപ്പെടുന്നവർക്ക് വിൽപ്പനക്കാരുടെയത്ര കടുത്ത ശിക്ഷ ലഭിക്കില്ലെങ്കിലും ഭാവി തുലാസിലാകാൻ ഇതുമതി. നാടുകടത്തുന്നത് ഉൾപ്പടെയുള്ള നടപടികൾ. മയക്കുമരുന്നിനെതിരെ അതിശക്തമായ നടപടികളാണ് എല്ലാ ഗൾഫ് രാജ്യങ്ങളും നടത്തുന്നത്. അത് മയക്കുമരുന്നിന്റെ വിപത്ത് തിരിച്ചറിഞ്ഞാണ്. ഓർക്കുക, തിരുത്താൻ അവസരമുണ്ട്. പക്ഷെ പിടിക്കപ്പെട്ടാൽ നിയമത്തിന്‍റെ വഴി കടുപ്പമുള്ളതാകും.
.
മയക്കുമരുന്ന് കേസുകളിൽ സാമൂഹിക പ്രവർത്തകർക്കായാലും ഇടപെടാൻ പരിമിതകളുണ്ട്. അതിന് പ്രധാന കാരണം അന്വേഷണത്തിന്റെയും നടപടികളുടെയും ഗൗരവമാണ്. അതുകൊണ്ട് മറ്റുള്ളവരാൽ ചതിക്കപ്പെടുന്ന സാഹചര്യങ്ങൾ ഒഴിവാക്കുക. നാട്ടിൽ നിന്ന് ചില മരുന്നുകൾ കൊണ്ടു വരുന്നതിൽ പോലും അതീവജാഗ്രതയും മുൻകൂട്ടി അനുമതിയും വേണം. അതിലുപരി ലഹരിയുടെ പിടിയിൽ പെടാതിരിക്കുക. പ്രവാസ ലോകത്ത് മലയാളിയുടെ സൽപ്പേര് കാലങ്ങളായി മുൻപേ കടന്നുപോയവർ അത്യധ്വാനം ചെയ്തുണ്ടാക്കിയതാണ്. ആ സൽപ്പേര് ഭാവിയിൽ വരുന്നവർക്ക് വേണ്ടി കൂടി കരുതി വെക്കേണ്ടതും കൈമാറേണ്ടതുമുണ്ട്.
.
.
വിവാഹം അന്വേഷിക്കുന്ന യുവതി യുവാക്കൾക്ക് അനുയോജ്യരായ ഇണകളെ കണ്ടെത്താം. പൂർണമായും സൗജന്യ സേവനം. ‘നിക്കാഹ് മാട്രിമോണി’ ഗ്രൂപ്പിൽ അംഗമാകുക.
