ഭാര്യയും മക്കളും സന്ദർശകവിസയിലെത്തിയത് 4 മാസം മുമ്പ്; മലയാളി പ്രവാസി സൗദിയിൽ വാഹനപകടത്തിൽ മരിച്ചു
റിയാദ്: സൗദിയിലുണ്ടായ വാഹനപകടത്തിൽ മലയാളി യുവാവ് മരിച്ചു. മലപ്പുറം നിലമ്പൂർ പയ്യമ്പള്ളി സ്വദേശി കാരാട്ടുപറമ്പിൽ ഹൗസിൽ അക്ബർ (37) ആണ് മരിച്ചത്. കിഴക്കൻ പ്രവിശ്യയിലെ അൽഅഹ്സയിലേക്ക് റിയാദിൽനിന്നുള്ള യാത്രാമധ്യേ പഴയ ഖുറൈസ് പട്ടണത്തിൽവെച്ചാണ് അപകടമുണ്ടായത്. ഇദ്ദേഹം ഓടിച്ചിരുന്ന മിനിട്രക്ക് ട്രെയിലറിന് പിന്നിൽ ഇടിച്ചായിരുന്നു അപകടം. വെള്ളിയാഴ്ച ജുമുഅക്ക് തൊട്ടുമുമ്പാണ് അപകടം നടന്നത്.
.
ഓട്ടോ സ്പെയർപാർട്സ് ബിസിനസ് നടത്തുന്ന റിയാദിലെ അലൂബ് കമ്പനിയിലാണ് അക്ബർ ജോലി ചെയ്തിരുന്നത്. കമ്പനിയുടെ അൽഅഹ്സ മേഖലയിൽ സെയിൽസ്മാനായിരുന്നു ഇദ്ദേഹം. ജോലിയുടെ ഭാഗമായി മിനിട്രക്കുമായി റിയാദിൽവന്ന് കമ്പനി ഗോഡൗണിൽനിന്ന് ചരക്കുമായി അൽഅഹ്സയിലേക്ക് മടങ്ങുകയായിരുന്നു അക്ബർ. ഇതിനിടെ പഴയ ഖുറൈസ് പട്ടണത്തിൽ വെച്ച് ഹൈവേയിൽനിന്ന് ബ്രാഞ്ച് റോഡിലേക്ക് അപ്രതീക്ഷിതമായി തിരിഞ്ഞ ട്രയിലറിന് പിന്നിൽ അക്ബറിൻ്റെ മിനിട്രക്ക് ഇടിച്ചായിരുന്നു അപകടമുണ്ടായത്. ഇടിയുടെ ആഘാതത്തിൽ തകർന്ന വാഹനത്തിനുള്ളിൽ കുടുങ്ങിയ അക്ബർ തൽക്ഷണം മരിച്ചു. ഈ സമയം ഭാര്യയും രണ്ട് മക്കളുമടങ്ങുന്ന കുടുംബം ഇതൊന്നുമറിയാതെ താമസ സ്ഥലത്തുണ്ടായിരുന്നു. നാല് മാസം മുമ്പാണ് ഭാര്യയും മക്കളും സന്ദർശനവിസയിലെത്തിയത്. അക്ബറിൻ്റെ മരണത്തെ തുടർന്ന് കമ്പനിയധികൃതർ ശനിയാഴ്ച കുടുംബത്തെ നാട്ടിലേക്ക് അയച്ചു.
.
ഫസ്ന പാറശ്ശേരിയാണ് ഭാര്യ, മക്കൾ: ഫാതിമ നൈറ (ഒമ്പത്), മുഹമ്മദ് ഹെമിൻ (രണ്ട്). പരേതനായ കാരാട്ടുപറമ്പിൽ ഹസനാണ് പിതാവ്. മാതാവ്: സക്കീന ഉമ്മ, ജാഫർ, റഹ്മാബി എന്നീ സഹോദരങ്ങളുണ്ട്.
അപകടവിവരമറിഞ്ഞ് കമ്പനി മാനേജിങ് ഡയറക്ടറും മലയാളിയുമായ അഷ്റഫ് എറമ്പത്ത് സംഭവസ്ഥലത്ത് എത്തിയിരുന്നു. തുടർ നടപടികൾക്ക് അദ്ദേഹം നേതൃത്വം നൽകുന്നു. മരണാനന്തര നിയമനടപടികൾ പൂർത്തീകരിക്കാനും മൃതദേഹം നാട്ടിലെത്തിക്കാനുമുള്ള പ്രവർത്തനങ്ങളുമായി കെ.എം.സി.സി അൽഅഹ്സ ഘടകം ഭാരവാഹി നാസർ കണ്ണൂരും സഹപ്രവർത്തകരും കമ്പനി പ്രതിനിധി നാസർ വണ്ടൂരും ഒപ്പമുണ്ട്.
.
.
വിവാഹം അന്വേഷിക്കുന്ന യുവതി യുവാക്കൾക്ക് അനുയോജ്യരായ ഇണകളെ കണ്ടെത്താം. പൂർണമായും സൗജന്യ സേവനം. ‘നിക്കാഹ് മാട്രിമോണി’ ഗ്രൂപ്പിൽ അംഗമാകുക.
