പ്രായപൂര്‍ത്തിയാകാത്ത വിദ്യാര്‍ഥിനിയെ പീഡിപ്പിച്ചു; കോച്ചിങ് സെൻ്ററിലെ രണ്ട് അധ്യാപകര്‍ അറസ്റ്റില്‍
കാണ്‍പുര്‍: ഉത്തര്‍പ്രദേശിലെ കാണ്‍പുരില്‍ പ്രായപൂര്‍ത്തിയാകാത്ത വിദ്യാര്‍ഥിനിയെ പീഡിപ്പിച്ച് നഗ്നദൃശ്യങ്ങള്‍പകര്‍ത്തുകയും ഭീഷണിപ്പെടുത്തി നിരന്തരമായി പീഡിപ്പിക്കുകയും ചെയ്ത കേസില്‍ രണ്ട് അധ്യാപകര്‍ അറസ്റ്റില്‍. വിദ്യാര്‍ഥിനി നീറ്റ് മെഡിക്കല്‍ എന്‍ട്രന്‍സ് പരീക്ഷയ്ക്കായുള്ള തയ്യാറെടുപ്പിനായി പൊയ്‌ക്കൊണ്ടിരുന്ന കോച്ചിങ് സെന്ററിലെ അധ്യാപകരായ സാഹില്‍ സിദ്ദിഖ് (32), വികാസ് പോര്‍വാള്‍ (39) എന്നിവരാണ് അറസ്റ്റിലായത്. കാണ്‍പൂരിലെ പേരുകേട്ട എന്‍ട്രന്‍സ് പരീക്ഷാ കോച്ചിങ് സെന്ററിലെ അധ്യാപകരാണ് ഇരുവരും.
സംഭവത്തെക്കുറിച്ച് പോലീസ് പറയുന്നതിങ്ങനെ; 2022-ല്‍ നീറ്റ് മെഡിക്കല്‍ എന്‍ട്രന്‍സ് പരീക്ഷയ്ക്കായുള്ള തയ്യാറെടുപ്പിനായാണ് പെണ്‍കുട്ടി കാണ്‍പുരിലുള്ള കോച്ചിങ് സെന്ററില്‍ എത്തിയത്. ഈ വര്‍ഷം ജനുവരിയില്‍ കോച്ചിങ് സെന്ററിലെ ബയോളജി അധ്യാപകനായ സാഹില്‍ സിദ്ദിഖ് തന്റെ വീട്ടില്‍ നടക്കുന്ന പാര്‍ട്ടിയില്‍ പങ്കെടുക്കാന്‍ പെണ്‍കുട്ടിയെയും ക്ഷണിച്ചു. കോച്ചിങ് സെന്ററിലെ എല്ലാ വിദ്യാര്‍ഥികള്‍ക്കുമായുള്ള പാര്‍ട്ടിയാണെന്നാണ് പെണ്‍കുട്ടിയോട് പറഞ്ഞത്.
ഇതുവിശ്വസിച്ച് സാഹിലിന്റെ വീട്ടിലെത്തിയ പെണ്‍കുട്ടിക്ക് പിന്നീടാണ് ചതി മനസിലായത്. അവള്‍ മാത്രമാണ് ആ വീട്ടിലുള്ളത് എന്ന് മനസിലാക്കി രക്ഷപ്പെടാന്‍ ശ്രമിച്ച പെണ്‍കുട്ടിയെ സാഹില്‍ നിര്‍ബന്ധിച്ച് മദ്യപിപ്പിക്കുകയും ബലാത്സംഗം ചെയ്യുകയും നഗ്നദൃശ്യങ്ങള്‍ വീഡിയോയില്‍ പകര്‍ത്തുകയും ചെയ്തു. സംഭവത്തെക്കുറിച്ച് ആരോടെങ്കിലും പറഞ്ഞാല്‍ ദൃശ്യങ്ങള്‍ പുറത്തുവിടുമെന്നും മാതാപിതാക്കളെ കൊന്നുകളയുമെന്നും ഇയാള്‍ ഭീഷണിപ്പെടുത്തിയിരുന്നതായി പെണ്‍കുട്ടി പോലീസിനോട് പറഞ്ഞു.
ഈ ദൃശ്യങ്ങള്‍ ഉപയോഗിച്ച് ഭീഷണിപ്പെടുത്തി സഹില്‍ നിരന്തരം പെണ്‍കുട്ടിയെ ബലാത്സംഗം ചെയ്യുകയും ഇയാളുടെ വീട്ടില്‍ നടന്ന പാര്‍ട്ടികളില്‍ പങ്കെടുക്കാന്‍ നിര്‍ബന്ധിക്കുകയും ചെയ്തു. ഇത്തരത്തില്‍ ഒരു പാര്‍ട്ടിയില്‍വെച്ചാണ് കോച്ചിങ് സെന്ററിലെ കെമിസ്ട്രി അധ്യാപകനായ വികാസ് പോര്‍വാള്‍ (39) പെണ്‍കുട്ടിയെ പീഡിപ്പിച്ചത്. ഹോളി ആഘോഷത്തിനായി വീട്ടിലെത്തിയ പെണ്‍കുട്ടിയെ മാതാപിതാക്കളെ അപായപ്പെടുത്തും എന്ന് ഭീഷണിപ്പെടുത്തി വീണ്ടും വീട്ടിലേക്ക് വിളിച്ചുവരുത്തി സഹില്‍ പീഡിപ്പിച്ചു.
ഈയടുത്ത് സാഹില്‍ കോച്ചിങ് സെന്ററിലെ മറ്റൊരു പെണ്‍കുട്ടിയെ ശാരീരികമായി ഉപദ്രവിക്കുന്ന സിസിടിവി ദൃശ്യങ്ങള്‍ സാമൂഹിക മാധ്യമങ്ങളില്‍ വൈറലായി. ദൃശ്യങ്ങളുടെ അടിസ്ഥാനത്തില്‍ അറസ്റ്റിലായ സാഹില്‍ ജാമ്യത്തില്‍ പുറത്തിറങ്ങുകയും ചെയ്തു. സാഹില്‍ അറസ്റ്റിലായ കാര്യമറിഞ്ഞതോടെയാണ് പെണ്‍കുട്ടിക്ക് സംഭവത്തെക്കുറിച്ച് പുറത്തുപറയാനുള്ള ധൈര്യമുണ്ടായത്. ഇക്കഴിഞ്ഞ വ്യാഴാഴ്ച പെണ്‍കുട്ടി കല്യാണ്‍പുര്‍ പോലീസില്‍ പരാതി നല്‍കിയത്.
പരാതിയുടെ അടിസ്ഥാനത്തില്‍ എഫ്.ഐ.ആര്‍. ഫയല്‍ ചെയ്ത പോലീസ് അന്നുരാത്രി തന്നെ സാഹില്‍ സിദ്ദിഖിനെയും വികാസ് പോര്‍വാളിനെയും കസ്റ്റഡിയിലെടുത്ത് അറസ്റ്റ് രേഖപ്പെടുത്തി. പീഡിപ്പിക്കപ്പെട്ടിരുന്ന സമയത്ത് പെണ്‍കുട്ടി മൈനറായിരുന്നതിനാല്‍ കൂടുതല്‍ വിവരങ്ങള്‍ പുറത്തുപറയാനാകില്ലെന്നും പ്രതികളെ ചോദ്യം ചെയ്തുവരികയാണെന്നും അസിസ്റ്റന്റ് കമ്മീഷണര്‍ അഭിഷേക് പാണ്ഡേ പറഞ്ഞു. ഇരുപ്രതികളെയും ശനിയാഴ്ച കോടതിയില്‍ ഹാജരാക്കി.
.
.
വിവാഹം അന്വേഷിക്കുന്ന യുവതി യുവാക്കൾക്ക് അനുയോജ്യരായ ഇണകളെ കണ്ടെത്താം. പൂർണമായും സൗജന്യ സേവനം. ‘നിക്കാഹ് മാട്രിമോണി’ ഗ്രൂപ്പിൽ അംഗമാകുക.
.
