എടവണ്ണപ്പാറയിലെ കരാട്ടെ അധ്യാപകനെതിരെ കൂടുതൽ ആരോപണങ്ങളുമായി മറ്റു പെൺകുട്ടികളും രക്ഷിതാക്കളും രംഗത്ത്; പുറത്ത് വരുന്നത് ഞെട്ടിപ്പിക്കുന്ന വിവരങ്ങൾ

മലപ്പുറം വാഴക്കാട് 17 വയസുകാരിയുടെ മരണത്തിന് കാരണക്കാരനായ കരാട്ടെ അധ്യാപകൻ സിദ്ദിഖ് അലി നിരവധി പെൺകുട്ടികളെ പീഡിപ്പിച്ചിട്ടുണ്ടെന്ന് ആരോപണം. കുട്ടികളുടെ സ്വകാര്യ ഭാഗങ്ങളിൽ സ്പർശിക്കുന്നത് പതിവാണെന്ന് പീഡനത്തിന് ഇരയായ കുട്ടി പറഞ്ഞു. താൻ പരമഗുരുവാണെന്നും എല്ലാം കരാട്ടെയുടെ ഭാഗമാണെന്നും പറഞ്ഞാണ് പീഡനമെന്നും പെൺകുട്ടി പറഞ്ഞു.

”ഞാന്‍ പതിനഞ്ചാം വയസിലാണ് അവിടെ ചേരുന്നത്. കൊറോണ ആയതുകൊണ്ട് സ്കൂളില്ലായിരുന്നു. കൊറോണ ആണെങ്കിലും ബെല്‍റ്റ് എടുക്കണമെങ്കില്‍ വാഴക്കാട് ഊര്‍ക്കടവിലുള്ള ക്ലാസില്‍ ചെല്ലണമെന്ന് പറഞ്ഞിരുന്നു. അങ്ങനെയാണ് അവിടെ എത്തിപ്പെടുന്നത്. പരമഗുരു എന്താണെന്നാണ് ആദ്യം പഠിപ്പിച്ചത്. അത് ബോര്‍ഡില്‍ എഴുതിവച്ചിട്ടുണ്ടായിരുന്നു.

പരമഗുരു എന്ന് പറഞ്ഞാല്‍ നമ്മുടെ മനസിലുള്ള കാര്യങ്ങള്‍ പറയാതെ അറിയാന്‍ കഴിയുന്നൊരാള്‍ എന്നാണ്. ഈ പരമഗുരുവിന്‍റെ സാന്നിധ്യമുണ്ടായാല്‍ മാത്രമേ ജീവിതത്തില്‍ വിജയിക്കാന്‍ സാധിക്കൂ. അര്‍പ്പണ മനോഭാവമുള്ളവര്‍ക്ക് മാത്രമേ പരമഗുരുവിന്‍റെ സാന്നിധ്യം കിട്ടൂ. ഇത് പറഞ്ഞുവിശ്വസിപ്പിച്ചാണ് ആദ്യം കരാട്ടെ ക്ലാസില്‍ ചേര്‍ക്കുന്നത്. പരമഗുരുവാണ് ..അദ്ദേഹത്തിന്‍റെ സാന്നിധ്യമുണ്ടെങ്കില്‍ മാത്രമേ വിജയിക്കാന്‍ സാധിക്കൂ എന്നായിരുന്നു നമ്മുടെ മനസില്‍..ചെറിയ പ്രായത്തില്‍ അങ്ങനെ വിശ്വസിച്ചു. ഉദാഹരണമായിട്ട് ഒരു മിസിനെ വിളിച്ച് അയാള്‍ക്ക് ഉമ്മ തരാന്‍ പറഞ്ഞു. മിസ് ലിപ്പിന് ഉമ്മ കൊടുത്തു. എന്നിട്ട് ഇങ്ങനെയാവണം നിങ്ങളും എന്നാണ് ഞങ്ങളോട് പറഞ്ഞത്.

സീനിയേഴ്സ് ചെയ്യുന്നതും ഞങ്ങള്‍ക്ക് കാണിച്ചുതരുന്നതും ഇതായിരുന്നു. ഞങ്ങളും ആദ്യമൊക്കെ നിന്നുകൊടുക്കുമായിരുന്നു. കാരണം ഞങ്ങള്‍ക്ക് അറിയുമായിരുന്നില്ല. എട്ടും പൊട്ടും തിരിയാത്ത പ്രായമാണ്. കുറച്ചു കഴിഞ്ഞപ്പോഴാണ് മൂപ്പരുടെ തൊടലൊക്കെ മോശമാണെന്ന് മനസിലായത്. നെഞ്ചില്‍ തൊട്ടിട്ട് പറയും മനസറിയാനാണ്, ഹാര്‍ട്ട് ബീറ്റ് അറിയാനാണ് എന്നൊക്കെ. ശരീരത്തിന്‍റെ പല ഭാഗത്തും പിടിക്കും. സ്വകാര്യഭാഗങ്ങളിലൊക്കെ സ്പര്‍ശിക്കും. അതിനു ശേഷമാണ് ഞാന്‍ ക്ലാസ് നിര്‍ത്തിയത്. എല്ലാ കുട്ടികളോടും ഇങ്ങനെ തന്നെയാണ് പെരുമാറുന്നത്. പക്ഷെ ആര്‍ക്കും മനസിലാകാറില്ല. ഇതെല്ലാം കരാട്ടെയുടെ ഭാഗമാണ്, ശരീരം വച്ചിട്ടുള്ള കളിയാണ്, പല ഭാഗത്തും ടച്ച് ചെയ്യേണ്ടി വരും എന്നാണ് അയാള്‍ പറഞ്ഞത്. ഒരു കരാട്ടെ അധ്യാപകനെന്ന് പറഞ്ഞാല്‍ ടീച്ചര്‍,കൗണ്‍സിലര്‍,ഡോക്ടര്‍ ആണെന്നാണ് വാദം. ഒരു ഡോക്ടറാകുമ്പോള്‍ പലഭാഗത്തും സ്പര്‍ശിക്കേണ്ടി വരും. ഭാര്യയില്ലാത്ത നേരം നോക്കി ജ്യൂസുണ്ടാക്കാനാണെന്ന് പറഞ്ഞ് എന്നെ ഒറ്റക്ക് വിളിച്ചിട്ടുണ്ട്. പക്ഷെ ഞാന്‍ പോയിട്ടില്ല.

സ്വകാര്യ ഭാഗങ്ങളില്‍ സ്പര്‍ശിക്കുമ്പോള്‍ വേണ്ട എന്നു പറയാന്‍ പാടില്ല. മരിച്ച കുട്ടിയെ എനിക്കറിയാം.വലിയ അടുപ്പമൊന്നുമില്ല. കേട്ട കാര്യങ്ങളെല്ലാം സത്യമാണ്. നീതിക്കു വേണ്ടി പോരാടാന്‍ തന്നെയാണ് തീരുമാനമെന്നും പെണ്കുട്ടി പറഞ്ഞു.

 

 

കരാട്ടെ അധ്യാപകൻ സിദ്ദീഖ് അലി

 

വർഷങ്ങളായി കുട്ടികളോട് മോശമായാണ് ഇയാൾ പെരുമാറാറുള്ളതെന്ന് പീഡനത്തിനിരയായ മറ്റൊരു പെൺകുട്ടിയുടെ മാതാവും വ്യക്തമാക്കി . തന്‍റെ മകളെ സിദ്ദിഖ് അലിയുടെ കരാട്ടെ ക്ലാസിൽ ചേർത്തത് മുതൽ ആശങ്കപ്പെടുത്തുന്ന കാര്യങ്ങളാണ് കണ്ടത്. ഈ കാര്യങ്ങളെല്ലാം വിശദമായി സാമൂഹ്യ മാധ്യമങ്ങളിൽ രണ്ട് വർഷം മുന്‍പ് പങ്കു വെച്ചിരുന്നെതെങ്കിലും കാര്യമായ പ്രതികരണങ്ങൾ ഉണ്ടായില്ലെന്നും എട്ട് വയസുകാരിയുടെ മാതാവ് പറഞ്ഞു.

”2021 സെപ്തംബറിലാണ് മോളെ അവിടെ ചേര്‍ത്തത്. ആദ്യം ദിവസം തന്നെ എന്തോ കുഴപ്പമുള്ളതുപോലെ എനിക്ക് തോന്നിയിരുന്നു. അധ്യാപകനും കുട്ടികളും തമ്മിലുള്ള ഇടപഴകല്‍ ഒരു സാധാരണ കുട്ടികളും അധ്യാപകനും തമ്മിലുള്ള ബന്ധമായിരുന്നില്ല. അയാള്‍ അഭിനയിക്കുന്ന പോലെയാണ് തോന്നിയത്. വല്ലാത്തൊരു അറ്റാച്ച്മെന്‍റാണ് അവര് തമ്മിലുണ്ടായിരുന്നത്. എന്‍റെ തോന്നലായിരിക്കുമെന്നാണ് ആദ്യം കരുതിയത്. മൂന്നു തവണ മാത്രമാണ് ഞാനവിടെ പോയിട്ടുള്ളത്. 17-18 വയസ് പ്രായമുള്ള കുട്ടികള്‍ അവിടെയുണ്ടായിരുന്നു. അവരും സാറും തമ്മിലുള്ള ബന്ധം കണ്ടാല്‍ മനസിലാകും. അവര് തമ്മില്‍ ഒന്നിനും ഒരു മറയുണ്ടായിരുന്നില്ല. അതെങ്ങനെയാണെന്ന് എനിക്ക് വിശദീകരിക്കാന്‍ കഴിയില്ല. കരാട്ടെ പഠിപ്പിക്കുന്നതിനപ്പുറം ഹിപ്നോട്ടിസത്തിലൂടെയോ എങ്ങനെയാണെന്നറിയില്ല അവരുടെ മനസിനെ പോലും കീഴ്പ്പെടുത്തുന്നുണ്ടെന്ന് എനിക്കന്നത് തോന്നിയിട്ടുണ്ടായിരുന്നു.

ഞാന്‍ ചെറുതായി അന്വേഷണം നടത്തിയിരുന്നു. ആണ്‍കുട്ടികളോട് പോലും അയാള്‍ മോശമായി പെരുമാറാറുണ്ടെന്നാണ് കേട്ടത്. ഫീസ് പോയാലും കുഴപ്പമില്ലെന്ന് കരുതി കരാട്ടെ പഠനം നിര്‍ത്തുകയായിരുന്നു. കൃത്യമായി തെളിവില്ലാത്തതിനാല്‍ എന്താണ് കാരണമെന്ന് ആരോടും പറഞ്ഞില്ല. പിന്നീട് 2021 ഡിസംബറില്‍ ഇയാള്‍ക്കെതിരെയുള്ള ഒരു വാര്‍ത്ത കണ്ടപ്പോള്‍ എന്‍റെ മോളെ രക്ഷിക്കാനായല്ലോ എന്ന സന്തോഷമായിരുന്നു.

അവിടെ പഠിക്കുന്ന മറ്റു കുട്ടികളെ അറിയിക്കാന്‍ വേണ്ടിയാണ് ഫേസ്ബുക്കില്‍ ഞാനീ വിവരം പങ്കുവച്ചത്. ഈയൊരു സമൂഹത്തിനെ ഞാന്‍ കുറ്റപ്പെടുത്തുകയുള്ളൂ. കണ്ടറിയില്ല, കൊണ്ടാ മാത്രമേ അറിയൂ. അയാള്‍ക്ക് തക്ക ശിക്ഷ കിട്ടട്ടെ..എട്ടുവയസുകാരിയായ പെണ്‍കുട്ടിയുടെ മാതാവ് പറഞ്ഞു.

(കടപ്പാട്: മീഡിയവണ്)

 

കൂടുതൽ വാർത്തകൾക്ക് വാട്സ് ആപ്പ് ഗ്രൂപ്പിൽ അംഗമാകാൻ ഇവിടെ അമർത്തുക

തൊഴിൽ വാർത്തകൾക്കും മറ്റു പ്രധാന അറിയിപ്പുകൾക്കും വാട്സ് ആപ്പ് ചാനൽ പിന്തുടരാൻ ഇവിടെ അമർത്തുക