കാർ ബൈക്കിലിടിച്ച് 43കാരന് ദാരുണാന്ത്യം; അറ്റുപോയ തല കണ്ടെത്തിയത് മണിക്കൂറുകൾ നീണ്ട തിരച്ചിലിനൊടുവിൽ

ഞായറാഴ്ച പുലർച്ചെ 3.45-ഓടെയാണ് സംഭവം. പുതുനഗരം മാർക്കറ്റിൽനിന്ന് മീൻ വാങ്ങിയശേഷം വില്പനയ്ക്കായി ചിറ്റൂർ ഭാഗത്തേക്ക് പോകുകയായിരുന്നു മണികണ്ഠൻ. അമ്പാട്ടുപാളയം ഇറക്കം പിന്നിട്ടപ്പോൾ എതിരേ വരികയായിരുന്ന കാർ നിയന്ത്രണംവിട്ട് റോഡിന്റെ വലതുവശത്തേക്ക് കയറുകയും ബൈക്ക് ഇടിച്ചുതെറിപ്പിക്കുകയുമായിരുന്നു.

അമിതവേഗത്തിലായിരുന്ന കാർ സമീപത്തെ ചാലിലേക്കിറങ്ങി പലവട്ടം തകിടം മറിഞ്ഞു. തുടർന്ന്, എതിർദിശയിലേക്ക് തിരിഞ്ഞ് റോഡരികിലെ മേൽക്കൂര പൊളിച്ചിട്ടിരിക്കുന്ന കെട്ടിടത്തിന്റെ ഭിത്തിയിൽ പിൻഭാഗം ഇടിച്ചശേഷം തലകീഴായി മറിഞ്ഞുനിന്നു.

ബൈക്ക് യാത്രികന്റെ ശരീരത്തിൽനിന്ന് തല വേർപെട്ട് ദൂരേക്കു തെറിച്ചു. ഇടിയുടെ ആഘാതത്തിൽ പിന്നിലേക്ക് ഏറെ ദൂരം തെറിച്ചുപോയ ബൈക്ക് റോഡരികിൽ വീണ് കത്തിയമർന്നു. ശബ്ദംകേട്ട് വീടുകളിൽനിന്ന് എഴുന്നേറ്റുവന്ന നാട്ടുകാരാണ് ആദ്യം രക്ഷാപ്രവർത്തനത്തിനിറങ്ങിയത്. ഇതിനിടെ, കാറിലുണ്ടായിരുന്ന നാലുപേരിൽ മൂന്നുപേർ പുറത്തിറങ്ങി. വൈകാതെ കാറിൽ കുടുങ്ങിക്കിടന്നയാളെയും പുറത്തെത്തിച്ചു. ചിറ്റൂർ അഗ്നിരക്ഷാസേനയും പോലീസും സ്ഥലത്തെത്തി. ബൈക്കിലെ തീ വെള്ളമൊഴിച്ചു കെടുത്തി. കാറിന്റെ പിൻഭാഗവും ഇടതുവശവും പൂർണമായി തകർന്നു.

കൊല്ലം കരുനാഗപ്പള്ളി രജിസ്ട്രേഷനിലുള്ളതാണ് കാർ. കാറിലുണ്ടായിരുന്ന ചിറ്റൂരിലെ സ്വകാര്യ മെഡിക്കൽ കോളേജ് വിദ്യാർഥികളായ കുമളി സ്വദേശി വസീം സലീം (29), തിരുവനന്തപുരം വട്ടിയൂർക്കാവ് സ്വദേശി ഗണപതി (29), കൊല്ലം കടത്തൂർ തഴവ സ്വദേശി സായിയാദവ് (26), ചെങ്ങന്നൂർ സ്വദേശി അശോക് (24) എന്നിവരെ ചെറിയ പരിക്കുകളോടെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചു.

ചിറ്റൂർ ഗവ. കോളേജിന് സമീപത്തെ ബേക്കറിയിലേക്ക് ചായ കുടിക്കാൻ പോകുകയായിരുന്നെന്ന് വിദ്യാർഥികൾ പോലീസിനു മൊഴിനൽകി. കാറോടിച്ച സായ് യാദവിനെതിരേ അശ്രദ്ധമായി വാഹനമോടിച്ച് അപകടംവരുത്തിയതിന് ചിറ്റൂർ പോലീസ് കേസെടുത്തു.