വിവാഹിതയായ നഴ്‌സിംഗ് വിദ്യാർത്ഥിനിയും മലയാളി യുവാവും ബംഗളൂരുവിലെ ഫ്ലാറ്റിൽ മരിച്ച നിലയിൽ

ബെംഗളൂരു: നഴ്‌സിംഗ് വിദ്യാർത്ഥിനിയെയും മലയാളിയായ ആൺസുഹൃത്തിനെയും ഫ്ളാറ്റിനുള്ളിൽ തീകൊളുത്തി മരിച്ചനിലയിൽ കണ്ടെത്തി. പശ്ചിമ ബംഗാൾ സ്വദേശിനി സൗമിനി ദാസ് (20), ഇടുക്കി സ്വദേശി അബിൽ എബ്രഹാം (29) എന്നിവരാണ് മരിച്ചത്. ബംഗളൂരുവിലെ ഒരു സ്വകാര്യ നഴ്‌സിംഗ് കോളേജിലെ രണ്ടാംവർഷ നഴ്‌സിംഗ് വിദ്യാർത്ഥിനിയായിരുന്നു സൗമിനി. ബംഗളൂരുവിൽ ഒരു നഴ്‌സിംഗ് റിക്രൂട്ട്‌മെന്റ് ഏജൻസി നടത്തിവരികയായിരുന്നു അബിൽ. ഞായറാഴ്ച ഉച്ചയ്ക്ക് 12.40-ഓടെ കൊത്തന്നൂര്‍ പോലീസ് സ്‌റ്റേഷന്‍ പരിധിയിലെ ദൊഡ്ഡഗുബ്ബിയിലെ സ്വകാര്യ അപ്പാര്‍ട്ട്‌മെന്റിലായിരുന്നു സംഭവം.

സൗമിനി വിവാഹിതയാണ്. പശ്ചിമബംഗാൾ സ്വദേശിയാണ് ഭർത്താവ്. അബിൻ അവിവാഹിതനാണ്. കുറച്ച് മാസങ്ങൾക്ക് മുൻപാണ് സൗമിനിയും അബിനും പരിചയപ്പെടുന്നത്. തുടർന്ന് ഇരുവരും പ്രണയത്തിലാവുകയായിരുന്നു. സൗമിനിയുടെ വീട്ടിൽ അബിൻ ഇടയ്ക്കിടെ സന്ദർശനം നടത്താറുമുണ്ടായിരുന്നു. അടുത്തിടെ നാട്ടിലേയ്ക്ക് പോയ സൗമിനി അബിനുമായുള്ള ബന്ധം ഭർത്താവിനെ അറിയിക്കുകയും വിവാഹജീവിതം തുടരനാവില്ലെന്ന് വ്യക്തമാക്കുകയും ചെയ്തിരുന്നു. ഇതിനുശേഷം സൗമിനിയും ഭർത്താവും തമ്മിൽ വഴക്കിടുന്നത് പതിവായിരുന്നുവെന്ന് പ്രാദേശിക മാധ്യമങ്ങൾ റിപ്പോ‌ർട്ട് ചെയ്യുന്നു.

അപ്പാര്‍ട്ട്‌മെന്റ് കെട്ടിടത്തിലെ നാലാംനിലയിലാണ് ഇരുവരും താമസിച്ചിരുന്നത്. ഞായറാഴ്ച ഉച്ചയോടെയാണ് അയൽവാസികൾ ഫ്‌ളാറ്റില്‍നിന്ന് നിലവിളി കേട്ടത്. തീ ഉയരുന്നതും ശ്രദ്ധയില്‍പ്പെട്ടു. തുടര്‍ന്ന് വാതില്‍ തകര്‍ത്ത് ഇരുവരെയും രക്ഷിക്കാന്‍ ശ്രമിച്ചെങ്കിലും ഫലംകണ്ടില്ല. സൗമിനി സംഭവസ്ഥലത്തുവെച്ചുതന്നെ മരിച്ചിരുന്നു. ഗുരുതരമായി പൊള്ളലേറ്റ അബിലിനെ വിക്ടോറിയ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.