അരുംകൊല; ആലപ്പുഴയിൽ ആറുവയസുകാരിയെ പിതാവ് വെട്ടിക്കൊന്നു, അമ്മയെ ആക്രമിച്ചു

മാവേലിക്കര: ആലപ്പുഴയിൽ പിതാവ് ആറുവയസുകാരിയായ മകളെ മഴു ഉപയോഗിച്ച് വെട്ടിക്കൊന്നു. മാവേലിക്കര പുന്നമൂട് ആനക്കൂട്ടിൽ നക്ഷത്ര ആണ് കൊല്ലപ്പെട്ടത്. കുട്ടിയുടെ പിതാവ് മഹേഷിനെ (38) പോലീസ് കസ്റ്റഡിയിലെടുത്തു. ബുധനാഴ്ച രാത്രി ഏഴരയോടെയാണ് കൊലപാതകം. മകളെ വെട്ടിക്കൊലപ്പെടുത്തിയത് മദ്യലഹരിയിലെന്നു പ്രാഥമിക വിവരം

വീട്ടിൽ നിന്നും ബഹളം കേട്ട് മഹേഷിൻ്റെ അമ്മ സുനന്ദ (62) വീട്ടിൽ എത്തുമ്പോൾ വെട്ടേറ്റ നിലയിൽ സോഫയിൽ കിടക്കുന്ന നക്ഷത്രയെ ആണ്. സംഭവം നടക്കുമ്പോൾ മഹേഷിൻ്റെ സഹോദരിയുടെ സമീപത്തെ വീട്ടിലായിരുന്നു അമ്മ സുനന്ദ. വെട്ടേറ്റ നിലയിൽ കുട്ടിയെ കണ്ട് വീട്ടിൽ നിന്നും പുറത്തേക്ക് ഓടിയ സുനന്ദയെ മഹേഷ് ആക്രമിച്ചു.

സുനന്ദയുടെ കൈക്ക് മുറിവേറ്റതായും ഇവരെ മാവേലിക്കര ജില്ലാ ആശുപത്രിയിൽ പ്രവേശിപ്പിച്ചതായും റിപ്പോർട്ടുണ്ട്. വീട്ടിൽ നിന്നും ബഹളം കേട്ട് ഓടിയെത്തിയവരെ മഹേഷ് മഴു കാട്ടി ഭീഷണിപ്പെടുത്തി. വിവരമറിഞ്ഞ് സ്ഥലത്തെത്തിയ പോലീസ് മഹേഷിനെ ബലം പ്രയോഗിച്ച് കസ്റ്റഡിയിലെടുത്തു.

സംഭവത്തിൽ പോലീസ് അന്വേഷണം ആരംഭിച്ചു. കുട്ടി സംഭവസ്ഥലത്ത് വെച്ച് തന്നെ മരിച്ചതായാണ് റിപ്പോർട്ട്. വിദേശത്ത് ജോലി ചെയ്തിരുന്ന മഹേഷിൻ്റെ ഭാര്യ മൂന്ന് വർഷം മുൻപ് ജീവനൊടുക്കുകയായിരുന്നു.