ബഹ്റൈൻ-ഇന്ത്യ ബന്ധത്തിൽ പ്രവാസികളുടെ പങ്ക് വളരെ വലുതെന്ന് ഇന്ത്യൻ അംബാസഡർ
ഇന്ത്യയുടെയും ബഹ്റൈനിൻ്റേയും വളർച്ചക്കും വികാസത്തിനും, ഇരുരാജ്യങ്ങൾക്കുമിടയിലുള്ള ഉഭയകക്ഷി ബന്ധം ശക്തമാക്കുന്നതിലും ബഹ്റൈനിലെ ഇന്ത്യൻ പ്രവാസികളുടെ പങ്ക് വളരെ വലുതാണെന്ന് ബഹ്റൈനിലെ ഇന്ത്യൻ അംബാസഡർ പിയൂഷ് ശ്രീവാസ്തവ പറഞ്ഞു. ഇന്ത്യയുടെ എഴുത്തി മൂന്നാം റിപ്പബ്ലിക് ദിനത്തിൽ എല്ലാ ഇന്ത്യക്കാർക്കും ആശംസ നേർന്ന് കൊണ്ട് സംസാരിക്കുകയായിരുന്നു അദ്ദേഹം. ഇന്ത്യയുടെ സ്വാതന്ത്ര്യത്തിന്റെ 75ാം വാർഷികവും ഇന്ത്യയും ബഹ്‌റൈനും തമ്മിലുള്ള നയതന്ത്രബന്ധം സ്ഥാപിച്ചതിന്റെ സുവർണജൂബിലിയും ആഘോഷിക്കുന്ന വേളയിലാണ് ഈ വർഷത്തെ റിപ്പബ്ലിക് ദിനം എന്നത് കൂടുതൽ സന്തോഷം നൽകുന്നതായും അദ്ദേഹം പറഞ്ഞു.
കോവിഡ് പ്രതിസന്ധിയുടെ പശ്ചാത്തലത്തിലും ഇരു രാജ്യങ്ങളും തമ്മിലെ ഉഭയകക്ഷി ബന്ധം ശക്തമായി മുന്നോട്ട് പോകുന്നുണ്ട്. ബഹ്റൈൻ വിദേശകാര്യ മന്ത്രി ഡോ. അബ്ദുൽ ലത്തീഫ് ബിൻ റാഷിദ് അൽ സയാനി 2021 ഏപ്രിലിൽ നടത്തിയ ഇന്ത്യ സന്ദർശനവും ഇന്ത്യൻ വിദേശകാര്യ സഹ മന്ത്രി വി. മുരളീധരൻ ആഗസ്റ്റിൽ നടത്തിയ ബഹ്റൈൻ സന്ദർശനവും ഇരു രാജ്യങ്ങൾക്കുമിടയിലെ പരസ്പരബന്ധം കൂടുതൽ ശക്തിപ്പെടുത്താൻ ഉതകുന്നതായിരുന്നു. കോവിഡ് കാലത്ത് ഇന്ത്യക്കാർ അടക്കമുള്ള പ്രവാസികൾക്ക് വാക്സിനേഷൻ ഉൾപ്പെടെ നൽകിയ പിന്തുണക്ക് ബഹ്റൈനോട് കടപ്പെട്ടിരിക്കുന്നതായും ഇന്ത്യൻ അംബാസഡർ പറഞ്ഞു.
വ്യാപാര, നിക്ഷേപ മേഖലയിലുൾപ്പെടെ സർവ്വ മേഖലകളിലും ഇരു രാജ്യങ്ങൾക്കുുമിടയിലുള്ള ബന്ധം സുസ്ഥിരവും ശക്തവുമാണ്. കഴിഞ്ഞ വർഷം ഇന്ത്യയും ബഹ്‌റൈനും തമ്മിലെ വ്യാപാരം 1.1 ബില്യൺ ഡോളർ കടന്നു. ഇന്ത്യയിൽനിന്ന് ബഹ്റൈനിലേക്കുള്ള നിക്ഷേപം 1.30 ബില്യൺ ഡോളറായും ബഹ്‌റൈനിൽനിന്ന് ഇന്ത്യയിലേക്കുള്ള നിക്ഷേപം 180 മില്യൺ ഡോളറായും ഉയർന്നു. കൂടാതെ യുവജന കാര്യം, ഹൈഡ്രോ കാർബൻ, ഐ.ടി, ആരോഗ്യം, ഫാർമസ്യൂട്ടിക്കൽ തുടങ്ങിയ മേഖലകളിൽ ബന്ധം പുതിയ തലങ്ങളിലേക്ക് വളർന്നതായും അംബാസഡർ വിശദീകരിച്ചു.
