ശരീരഭാരം കുറയ്ക്കാൻ യൂട്യൂബ് വീഡിയോ കണ്ട് ബോറാക്സ് കഴിച്ചു; കോളേജ് വിദ്യാർഥിനിക്ക് ദാരുണാന്ത്യം

ശരീരഭാരം കുറയ്ക്കാൻ ബോറാക്സ് (സോഡിയം ടെട്രാബോറേറ്റ് ) കഴിച്ചതിനെ തുടർന്ന് തമിഴ്നാട്ടിലെ സെല്ലൂരിലെ മീനമ്പൽപുരത്ത് 19കാരിയായ കോളേജ് വിദ്യാർഥിനിക്ക് ദാരുണാന്ത്യം. ദിവസവേതനക്കാരനായ വേൽ മുരുകൻ്റെയും വിജയലക്ഷ്മിയുടെയും മകളായ കലയരസിയാണ് മരിച്ചത്. ഒരു യൂട്യൂബ് ചാനലിലെ വീഡിയോ കണ്ട് ശരീരഭാരം കുറയ്ക്കാനായി ബോറാക്സ് വാങ്ങി കഴിച്ചതാണ് മരണത്തിന് കാരണമായത്.

ജനുവരി 17 ന് യൂട്യൂബ് വീഡിയോയിൽ കണ്ടതനുസരിച്ച് ബോറാക്സ് കഴിച്ചതോടെ പെൺകുട്ടിയ്ക്ക് ഛർദ്ദിയും വയറിളക്കവും അനുഭവപ്പെടുകയായിരുന്നു. സ്വകാര്യ ആശുപത്രിയിൽ ചികിത്സ തേടി വീട്ടിൽ തിരിച്ചെത്തിയെങ്കിലും പിന്നീട് ആരോഗ്യം വഷളാവുകയായിരുന്നു. രാത്രി 11 മണിയോടെ, വീണ്ടും കടുത്ത ഛർദ്ദിയും വയറിളക്കവും അനുഭവപ്പെട്ടതിനെ തുടർന്ന് പെൺകുട്ടിയെ സർക്കാർ ആശുപത്രിയിലേക്ക് കൊണ്ടു പോയെങ്കിലും വഴിമധ്യേ മരിക്കുകയായിരുന്നു.

സോഡിയം ബോറേറ്റ്, സുഹാഗ , വെങ്കാരം , സോഡിയം ടെട്രാബോറേറ്റ്, അല്ലെങ്കിൽ ബോറിക് ആസിഡ് എന്നും അറിയപ്പെടുന്ന ബോറാക്സ്, പൊടി പോലുള്ള വെളുത്ത ധാതുവാണ്. പതിറ്റാണ്ടുകളായി ഇത് ഒരു ക്ലീനിംഗ് ഉൽപ്പന്നമായി ഉപയോഗിച്ചു വരുന്നുണ്ട്. സാധാരണയായി ഗാർഹിക ക്ലീനറുകൾ, ഡിറ്റർജന്റുകൾ, കീട നാശിന എന്നിവയിലും ഇത് ഉപയോഗിക്കുന്നുണ്ട്. കുട്ടികൾ കളിക്കാൻ ഉപയോഗിക്കുന്ന സ്ലൈം ഉണ്ടാക്കുന്നതിനുള്ള ഒരു ചേരുവയായും ബോറാക്സ് ഉപയോഗിക്കുന്നു.
ബോറാക്സ് ഉള്ളിൽ ചെന്നാൽ ഓക്കാനം, ഛർദ്ദി, വയറിളക്കം, വയറുവേദന തുടങ്ങിയ ലക്ഷണങ്ങൾ ഉണ്ടാകാം, കഠിനമായ കേസുകളിൽ കൂടുതൽ ഗുരുതരമായ ആരോഗ്യപ്രശ്നങ്ങളിലേക്കും ഇത് നയിച്ചേക്കാം.